Meşa Tevgera Jinên Azad (TJA) ya ji bo azadiya Rêberê Gelê Kurd Abdullah Ocalan a ji Amedê ber bi Enqereyê ve dest pê kir. Jin bi girseyî hatin birêkirin.
Tevgera Jinên Azad (TJA) ji Amedê ber bi Enqereyê ve bi dirûşma “Em bi hêviyê ber bi azadiyê ve dimeşin” dest pê kir. Aktîvîstên TJAyê û bi sedan jin ewilî ji avahiya DEM Partiyê ya Amedê heta Rawestgeha Çeşmeyê ya li Semta Gazîlerê meş li dar xistin. Jinan pêşmalkên bi rengê mor ku nivîsa “Em bi hêviyê ber bi azadiyê ve dimeşin” nivîsandibû, li xwe kirin û meşiyan. Tevî astengî û êrişên polîsan jî jin meşiyan. Jinan bênavber dirûşm berz kirin û dengê dirûşmên wan li nav kuçe û cadeyên Amedê olan dan. Girseyek qelebalix jinan bi coşek mezin pêşwazî kir.
Li Rawestegeya Çeşmeyê ya li Semta Gazîlerê ku jin lê kom bûn daxuyanî hate dayîn. Aktîvîsta TJAyê Sabahat Tuncel axivî.
‘Azadiya Ocalan azadiya gelê Kurd e’
Sabahat Tuncel di axaftina xwe de wiha got: “Salek beriya niha li parlamentoya Tirkiyeyê Serokê MHPê bang kir û got bila Reberê Gelê Kurd Abdullah Ocalan were meclîsê biaxive. Lê hê jî ev yek pêk nehatiye. Heya li Rêberê Gelê Kurd Abdullah Ocalan neyê guhdarîkirin aştî çênabe. Aştî bi yek aliyekî pêk nayê. Azadiya Abdullah Ocalan azadiya gelê Kurd e. Xwestin îro meşa me asteng bikin. Astengkirina meşê ne li gorî ruhê pêvajoyê ye. Dewlet asteng dike, em Kurd jî alîgirên aştiyê ne.”
Piştî axaftina Tuncel, girseyek qelebalix li gel jinên meşvan heya ber Ceylan Karavîl AVMê meşiyan û jinên meşvan bi tîlîlî û berzkirina dirûşman ber bi Enqereyê bi rê kirin. Jin dê îro bigihîjin Rihayê.
