Gelê Amedê ji bo endama YJA-Starê Celîle Turk û endamê HPGê Ridvan Çelenk ku di dîrokên cuda de li herêma Zapê jiyana xwe ji dest dabûn meşiya û serdana şînê kir.
Malbatên endamên HPGê Celîle Turk (Fîlîz Dêrsim) û Ridvan Çelenk (Têkoşer Dorşîn) ku di dîrokên cuda de li herêma Zapê ya girêdayî bi ser Başûrê Kurdistanê ve jiyana xwe ji dest dabûn li Mala Şînê ya Şaklatê ya li navçeya Peyasê ya Amedê şîn danîn. HPGê duh ragihandibû ku endamê wan Ridvan Çelenk di 22yê Tîrmeha 2019an de û Celîle Turk jî di 18ê Tebaxa 2019an de li herêma Zapê jiyana xwe ji dest dane. Li ser vê yekê malbatên Turk û Çelenk ji bo zarokên xwe şîn danîn. Gelek endam û rêveberên partiyên siyasî, Dayikên Aştiyê, endam û rêveberên saiyên sivîl tev li şînê bûn.
Meş hate lidarxistin
Gelek kes di pêşengtiya Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) ya Amedê de bi girseyî li Parka Zarokan heta mala şînê ya Şaklatê meşiyan. Berî meşê polîsan bi deqeyan girse dorpêç kir û xwestin ku meşe asteng bikin. Lê di encama israra dayikan de girse bi çepik û tilîliyan li Parka Zarokan heta mala şînê meşiya. Girseyê dirûşmên “Şehîd namirin”, “Ey şehîd rêya te rêya me ye” berz kirin.
‘Divê em şehîdên xwe bêtir nas bikin û bidin nasîn’
Di şînê de hevserokê MEBYA-DERê yê Amedê Ramazan Dengiz axivî û diyar kir ku têkoşerên gelê Kurd ji bo wan nemirî ne û wiha got: “Şehîd namirin, şehîd dibin rêberê tekoşîna me. Ji Heqî, ji Kemalan heta roja îro gele Kurd berdêlên pir giran dan. Bi saya van şehîdan gele Kurd îro li hemû dinyayê tê nasîn. Tişta dikeve ser mile me ew e ku em hemû şehîdên xwe bêtir nas bikin, bidin nasîn, têkoşîna wan ji xwe re esas bigrin. Ya rastî di vê mijarê de em kêm dimînin. Em ji malbata her du şehîdan re sersaxiyê dixwazin, dibêjin bila sere gele Kurd sax be.”
Şînê bi serdana gelek kesan berdewam kir.
