Stranbêjê Kurd Kasim Taşdogan bi klîba “Xwebûn Li Te Tê” balê dikişîne ser xwebûn ango vegera li xwe.
Kasim Taşdogan yek ji hunermendên Kurd e ku di salên dawî de bi klîb û stranên xwe yên ji hev serkeftîtir û xweşiktir li pêşberî guhdar û muzîkhezan cih digire. Kasim Taşdogan vê carê jî bi stran-klîba, “Xwebûn Li Te Tê” balê dikişîne ser xwebûn ango vegera li xwe.
Taşdogan ji bo vê berhema nû klîbek ji portreyên mirovan pêk tê amade kiriye û li ser platformên xwe yên medya dîjîtal belav kir. Gotin û muzîka berhemê aîdî Taşdogan e û derhêneriya klîbê jî Omer Ateş kiriye.
Pênc berhemên berê
Taşdogan beriya niha jî di sala 2021an de strana “Xem Neke” amade kir, di sala 2022yan de bi strana “Vîna Sor” balê kişand ser berxwedana jinên Rojava, di sala 2023yan de jî strana “Ziryanim” ku gotinê wê aîdî girtiyê azadiyê Ramazan Çeper in û balê dikişîne ser Şengalê, di sala 2023yan de dîsa strana “Mîrate” ku balê dikişîne ser hilweşandina Heskîfê û talankirina xwezaya Kurdistanê û di sala 2024an de jî strana bi navê “Tofan” belav kiribû.
Gotinên strana “Xwebûn Li Te Tê” bi vî rengî ye:
“Gayê li pêş nîr ê alemê ne tu yî
Kevirê li dora zeviyê ne tu yî
Kihêla li bin siwarê xelkê ne tu yî
Xwebûn li te tê
Kîjan welatê te dizî û ji xwe re kir bakûr
Dara te bi kîjan şitla jehrî hatiye tamandin
Keskesora te niha kîjan ezmanê dixemlîne
Tov û barana axê tu yî were lixwe vegere
Xwebûn li te tê xwebûn li te tê
Lehengê çîrokê xwebûn li te tê”
