Amed – Hevserokê DEM Partiyê Tuncer Bakirhan di civîna têkildarî “pêvajoyê” tê lidarxistin de axivî û got: Ne tenê gotin, divê êdî gavên pratîk jî bên avêtin.”
Baroya Amedê bi tev li bûna Hevserokê giştî yê DEM Partiyê Tuncer Bakirhan, Parlementerê DEM Partiyê yê Amedê Cengîz Çandar, Endama Komîsyona Demokrasî, Xwişk-Biratî û Hevgirtina Mîllî Parlementera û DEM Partiyê ya Erziromê Meral Daniş Beştaş û gelek nûnerên saziyên sivîl, oteleke li Amedê civînek li dar xist. Moderatoriya civînê Serokê Baroya Amedê Abdulkadîr Guleç kir.
‘Divê qanûnên çareseriya demokratîk bên amadekirin’
Abdulkadîr Guleç di destpêkê de diyar kir ku li ser banga Dewlet Bahçelî ya 1ê Cotmeha 2024an û bi Manîfestoya Birêz Abdullah Ocalan ya 27ê Sibatê pêvajoyek dest pê kir û wiha got: “Dû re dîsa li ser banga Abdullah Ocalan PKKê bi komeke sembolik çekên xwe şewitand. Lê mixabin heta niha dewletê di warê qanûnî û hiqûqî de tu gav neavêtine. Divê demildest qanûnên ku mafê gele Kurd yê çandî û nasnameyî înkar dikin bên rakirin. Li Tirkiyeyê hê Destûra Bingehîn ya darbeye di meriyete de ye. Em wek Baroya Amedê dibêjin divê tavilê qanûnên çareseriya demokratîk bên amadekirin.”
‘Diviya heq, hiqûq, edalet di salekê de baştir bûna’
Tuncer Bakirhan jî destnîşan kir ku ji bo axaftin û pêkanîna aştiyê Amed ciheke sereke ye û wiha axivî: “Em ê biaxivin, nîqaş bikin ka em ê aştiyê çawa pêk bînin. Ev saleke em têdikoşin ka em çawa aştiyê ji civakê re bikin mal. Ev salek e ev nîqaş tên kirin. Ev saleke zemîna diyalogê didome, şer û pevçûn kêm bûne, sekna Birêz Abdullah Ocalan û tevgera wî pir girîng e. Lê dema mirov dinêre di nav salekî de diviyabû di warê heq, hiqûq û edaletê de em di rewşeke baştir da bûna. Ji bo vê yekê em ê xebatên xwe bidomînin.”
‘Guhdarkirin bes e, em kanûnan amade bikin’
Di berdewama axaftina xwe de Tuncer Bakirhan da zanîn ku Komîsyona li Meclisê ava bûye xebatên xwe didomîne û wiha pê de çû: “Ji bilî hin kêmasiyên ku heta niha di civînên komîsyonê de rû dane, xebatên komîsyonê girîng in. Lê divê êdî komîsyon dev ji guhdarkirinan berde, qanûnên demokratîk yên çareseriyê amade bike. Qanûnên ku aştî û demokrasiye pêş bixin, rêveberiyên xwecihî xurt bikin amade bike. Ev daxwazên hemû civakê ne.”
‘Çareseriya Sûriyeyê dê bibe mînak’
Tûncer Bakirhan ser geşedanên li Sûriyeyê jî sekinî û têkildarî mijarê ev tişt anî ziman: “Li Sûriyeyê jî rewş diyar e. Divê rewşa li Sûriyeyê li pêşiya pêvajoya li Tirkiyeyê wek astengî neye dîtin. Çareseriya ku li wir pêk were dê ji bo Tirkiyeyê jî bibe mînak.”
‘Divê Abdullah Ocalan azad bixebite’
Di dawiya axaaftina xwe de Tuncer Bakirhan da zanîn ku ji bo karibe wek azad ser pêvajoyê bixebite, divê şert û mercên Rêberê Gelê Kurd Abdullah Ocalan werin guhertin û wiha derbirî: “Birêz Ocalan ev 26 sal in di girtîgehê de, di bin tecrîdê de ye. Divê di vê mijarê de êdî tenê gotin na, gavên pratîk jî bên avêtin. Wekî Birêz Bahçelî jî di banga xwe de got bila mafê hêviyê êdî bikeve pratîkê.”
Piştî axaftina Tuncer Bakirhan civîn, ji çapemeniyê re girtî berdewam kir.
