Danasîna 2yemîn Şahiya Dîrok, Çand û Gastronomiyê ya Hîlarê ya ku ji hêla şaredariya Erxeniyê ya Amedê ve cara duyemîn tê lidarxistin, li Hîlarê pêk hat.
Danasîna 2yemîn Şahiya Dîrok, Çand û Gastronomiyê ya Hîlarê ya ku wê 3 rojan bidome bi beşdariya hevşaredarên Erxeniyê yên Amedê Bîrsen Azak Bayar û Şiyar Guldîken, endamên meclîsa şaredariyê, nûnerên sazîyên civakê ên sîvîl û gelek kesan pêk hat.
Hevşaredar Bîrsen Azak Bayar di axaftina vekirinê de diyar kir ku ew îro ji bo mîrateyek dîrokî ya hezar salî bigihîjînin nifşên pêşerojê li vir in. Bayar anî ziman ku Hîlar ji şikeftan wêdetir e û got, “Em li cihê dîroka ku ji jiyana bicîhbûyînê û mîrateya çandî re li van axan pêşengî û şahidî kiriye ne. Li vî cihê dîrokî ku şaristanî bi axê re digihije hev du, heywan hatine kedîkirin û tov şîn bûne, em we pêşwazî dikin. Ji bo ku vê dîrokê bi muzîk û gastronomiyê re bigihîjînin hev em li vir in. ” Di dawiya axaftina xwe de gel vexwend şahiya 3 rojan dê di 4-5 û 6ê Cotmehê de were lidarxistin.
Hevşaredar Şiyar Guldîken jî di axaftina xwe de diyar kir ku jin ji serdema neolîtîkê ve ked dane û her tiştê ku heta roja îro tê çandin bi destên jinan hatiye afirandin. Guldîken, destnîşan kir ku genim, ceh û nîskên pêşîn li vir hatine hilberandin û got, “Ev bajar, bajarekî dîrokî ye. Dîroka mirovahiyê 12,000 sal berê li vir hatiye damezrandin. 62 sal berê ev der hate kolandin (Qotê Berçem). Di encama van kolandinan de aşkere bû ku yekemîn wargeh û yekemîn gundê cîhanê ev der in. Hemû arkeolog û dîroknas li ser vê yekê heman tiştî difikirin. Em ji xwe dipirsin, ‘Em kî ne, em ji ku tên û em diçin ku derê?’ Armanca me bi vê şahiyê ew e ku em bersivên van pirsan bibînin.”
Guldîken, ji bo ku bi fêr bûna rabirdûyê pêşerojê ava bikin, her kesî vexwend 2yemîn Şahiya Dîrok, Çand û Gastronomiyê a Hîlarê, ku dê di 4-5 û 6ê Cotmehê de were lidarxistin.
