Însiyatîfa ji Girtiyên Nexweş re Azadî vê hefteyê bal kişandin ser rewşa girityê nexweş Seyad Erîşmîş û xwest tedawiya Erîşmîş bi rêk û pêk bi cih were û înfaza wî were taloqkirin.
Însiyatîfa ji Girtiyên Nexweş re Azadî ji bo balê bikişîne ser rewşa girtiyên nexweş di hefteya 577emîn de li Cadeya Sakarya ya li Enqereyê daxuyanî da. Di daxuyaniyê de pankarta li ser, “Tedawî maf e nayê astengkirin, bila girtiyên nexweş bên berdan” dinivisî hate vekirin û çalakvanan bê navber dirûşmeyên,”Tecrîd îşkence ye bila bi dawî bibe” û “Ji girtiyên nexweş re azadî” berz kirin. Metna daxuyaniyê ji aliyê Hevserokê Komeleya Mafê Mirovan (ÎHD) a Şaxa Enqereyê Omer Faruk Yazmaci ve hate xwendin. Omer Faruk Yazmaci di daxuyaniya vê hefteyê de bal kişand ser rewşa girtiyê nexweş Seyad Erîşmîş ê li Girtîgeha Ewlehiya Bilind a Erzînganê ragirtî ye.
‘Seyad Erîşmîş ji ber nexweşiyan bêzar bûye’
Omer Faruk Yazmaci diyar kir ku li gor tespîtên wan herî kêm hezar û 412 girtiyên nexweş hene û ji ber tedawiya girtiyan bi rêk û pêk nayê kirin rewşa girtiyên nexweş her ku diçe xerabtir dibe. Omer Faruk Yazmaci anî ziman ku Seyad Ermîş tevî nexweşiyên giran jî ev 9 sal in di girtîgehê de ye û wiha got: “Seyad Erîşmîş 5 sal in nexweş e. Mehê pênc şeş caran krîzê derbas dike. Sendroma epîlepsî hatiye tespîtkirin û bi dermanan tê tedawîkirin. Di her du gurcikên wî de kevir hene. Du caran kevirên wî hatine şikandin, lê tevî ku bi salan derman bikar tîne jî baş nebûye. Nêzîkî 6 sal in ku bi nexweşiya gurcikan re rû bi rû ye. Di heman demê de fitiqa wî ya mîde jî heye. Ji ber ku her tim goşt tev li xwarinan dikin nikare têr xwarinê bixwe û ji 76 kîloyan daketiye 65 kîloyan. Em daxwaz dikin ku Seyad Erîşmîş ji hucreya yek kesî derxin qawîşê. Bila tedawiya wî bi rêk û pêk were kirin. Her wiha înfaza wî were taloqkirin.”
Daxuyanî bi berzkirina dirûşmeyan bi dawî bû.
