Amed – Hevserokê MED TUHAD-FEDê Kerem Canpolat destnîşan kir ku Tirkiye erênî nêzî mafê hêviyê nabe û wîha got: “Reberê Gelê Kurd Abdullah Ocalan divê azad be, hevdîtinê bi civakê re bike û gotina xwe parve bike.”
Rêberê Gelê Kurd Abdullah Ocalan ev 27 sal in di bin tecrîdeke girankirî de li Girtîgeha Girava Îmraliyê tê ragirtin. Dadgaha Mafê Mirovan a Ewropayê (DMME) cezayê heta hetayê yê li Rêberê Gelê Kurd Abdullah Ocalan hatiye birîn wek îşkence pênase kir û di sala 2015an de derbarê cezayê heta hetayê yên li Tirkiyeyê tên dayîn wek ‘binpêkirina mafan’ pênase kir û ji Tirkiyeyê xwest ji bo mafê hêviyê were hin qanûnan amade bike. Tirkiye ev 12 sal in ji bo mafê hêviyê hêj tu gav neavêtine. Komîteya Wezîran a Konseya Ewropayê di navbera 15 û 17ê Îlonê de civiya û ji bo mafê hêviyê pêk bîne, heya Hezîrana 2026an mohlet da Tirkiyeyê.
Hevserokê Federasyona Komeleyên Hiqûq û Piştevaniyê Ya Malbatên Girtî û Hikumxwaran a Medê (MED TUHAD-FED) Kerem Canpolat di derbarê ‘mafê hêviyê’ de ji ajansa me re axivî. Kerem Canpolat pêkneanîna mafê heviyê wek binpêkirina hiqûqê pênase kir û wiha got: “Dewleta Tirkiyê dixwaze girtî heya dawiya jiyana xwe di zindanan de bê ragirtin. Bi rastî ji bo girtiyan û malbatên wan ev weke işkenceyê tê dîtin. Dadgeha Mafê Mirovan ya Ewropayê rewşa girtiyên 20 an 25 salan di girtîgehan de mane berçav derbas dike û heke rewşa girtiyan erênî be ji bo wan mafê hêviyê pêk tîne. Li Ewropayê mînakên bikaranîna mafê heviyê hene. Lê mixabin hêj jî li Tirkiyeyê mafê hêviyê pêk nehatiye.”
‘Heke hêviya derketinê tune be, girtin mirin e’
Kerem Canpolat anî ziman kû Tirkiyeyê ji bo mafê heviyê yê Rêberê Gelê Kurd Abdullah Ocalan erênî nêz nabe û wiha berdewam kir: “Reberê Gelê Kurd Abdullah Ocalan divê azad be, hevdîtinê bi civakê re bike, gotina xwe parve bike. Divê teqez mafê hêviyê bikeve meriyetê. Rêberê Gelê Kurd Abdullah Ocalan temsîliyeta rêxistina xwe û gelê xwe dike. Em dixwazin dewlet gav biavêje û mafê hêviyê pêk bîne. Bi hezaran girtî ji ber vê rewşê mexdur bûne. Ev girtî her roj zextê dibînin. Heke hêviya derketinê tune be, ew rewş mirin e.”
‘Divê dewlet zagonên xwe biguherîne’
Di dawiya axaftina xwe de Kerem Canpolat diyar kir ku di serî Rêberê Gelê Kurd Abdullah Ocalan û hemû girtiyên ku cezayên giran li wan hatine birîn, divê mafê hêviyê bi kar bînin û got: “Divê teqez dewlet zagonên xwe biguherîne. Tirkiye divê Mafê Hêviyê ya Rêberê Gelê Kurd Abdullah Ocalan pêk bîne, berdana girtiyan têxe meriyetê, li gorî berpirsayariya xwe gavan biavêje. Lê mixabin Tirkiye hêj jî ji aliye siyasî ve gavên şênber neavêtiye.”
