Şirnex- Li Welêt êdî karê berikên bi destan tên çêkirin nemaye û gel berikên xwe yên kevin jî difiroşe. Welatiyê bi navê Îhsan Berk, gund bi gund digere û berikên kevn ji welatiyan dikire.
Li Kurdistanê salên berê welatiyan berikên ku li mala xwe radixandin, bi destan çêdikirin. Ev li her maleke wekî çandekê bû. Piştî ku berikên fabrîkasyonê derketin welatî êdî nema berikan bi destan çêdikin û berikên kevin ên di malan de jî ji ber ku şuştin û danîn û rakirina wan zehmet de bikar naînin. Welatiyê bi navê Îhsan Berk, gund û bi gund digere û berikên êdî nayên bikaranîn ji welatiyan dikire û pê debara xwe dike.
Li Wan, Şirnex û Colemêrgê digere
Îhsan Berk diyar kir ku ji ber êdî gel berikên bere bikar naîne ew dirizin û wiha axivî: “15 sal in, ez li gundan digerim û berikên kevin dikirim. Êdî gelê me berikên berê bi dest hatine çêkirin bikar naîne. Piraniya wan rakirine û dirizin. Ez jî li Wanê, Colemêrgê, Şirnexê gund û bi gund digerim van berikan kom dikim. Kesên ku ji min dikirin hene û ew jî difiroşin dewletên derve.”
Êdî kes berikên bi destan çênake
Îhsan Berk da zanîn ku êdî li herêmê tu kes bi karê çêkirina berikan mijûl nabe û axaftina xwe wiha domand: “Gelê me êdî berikan çênake. Ji ber ku rakirin û paqijkirina wan jî zehmet e, tu kes di mala xwe de bikar naîne. Ji ber vê yekê em ji başûr û rojhilatê Kurdistanê jî berikan dixwazin û difiroşin dewletên ewrûpa. Bihaya wan ji 50 dolar heya 1000 dolar em dikirin. Buhaya wan jî li gor nexş û kevnatiya wan em diyar dikin.”
Ji bo berikan ji Meletiyê hat Cizîrê
Welatiyê bi navê Mûrat Tîmûrtaş ku ji Meletiyê hat Cizîrê û berikan dikire jî bi lêv kir ku ew salê çend caran tê Cizîrê û wiha axivî; “Salê du sê caran ez têm Cizîrê û berikan dikirim. Piştre em van dişon û paqij dikin. Piştî paqijkirinê em ji bo kirînê ji ewrûpa re wêneyê berikan dişinin. Dema kesên berikan bikirin daxwaz dikin, em ji wan re dişinin welatên ewrûpayê.”
