TJAyê daxuyand ku li cihê ku nîqaşa aştiyeke mayînde lê tê kirin de, qedexekirina zimanê dayikan, ne samîmî ye û got:” Li cihên ku zimanê Dayikên Aştiyê tê qedexekirin de em ê çawa qala aştiyê bikin.”
Komisyona Meclîsê ya ji bo çareseriyeke demokratîk hatiye avakirinê, di rûniştina 5emîn de axaftina bi kurdî ya Dayikên Aştiyê birî û nehişt ku dayik bi zimanê xwe biaxivin. Tevgera Jinên Azad (TJA) têkildarî mijarê daxuyaniya nivîskî belav kir. TJAyê got:”Bi awayekî lezgînî em dibêjin ku divê ji Dayikên Aştiyê lêborîn bê xwestin û li gor şert û mercên navneteweyî yên cîhanê ku mafên mirovî tên parastinê, tevbigerin.”
Di dewamiya daxuyaniyê de wiha hat gotin: “Komisyona ji bo çareseriyeke demokratîk li meclisê hatiye avakirin, di rûniştina 5emîn de axaftina bi kurdî ya Dayikên Aştiyê birî û nehişt ku dayik xwe bi zimanê xwe bînin ziman.
Dayikên Aştiyê ku bi dehan salane ji bo aştî bê avakirinê li qadan li hember tundî û neheqiya dewletê li ber xwe dayî, di Komisyona ji bo aştiyê de zimanê wan tê qedexekirin û bi vî awayî dengê wan tê qutkirin.
Ev kiryarên feraseta netewe dewleta ku ziman û hebûna kurdan tune dihesîbîne, em dizanin ku pratîkên feraseta şerxwaz e. Bi salane ku çawa van dayikan li dijî bêedaletî, şer, tundî û tunehsibandina dewletê li ber xwe dane û serî netewandine dê bi heman awayî di komisyona ji bo aştiyê de jî doza mafên mirovî bikin û paş de gav neavêjin.
Em wek Tevgera Jinên Azad careke din dibêjin ku li cihê ku nîqaşa aştiyeke mayînde lê tê kirin, qedexekirina zimanê dayikan, ne samîmî ye. Li cihên ku zimanê Dayikên Aştiyê tê qedexekirin de em ê çawa qala aştiyê bikin.
Bi awayekî lezgînî em dibêjin ku divê ji Dayikên Aştiyê lêborîn bê xwestin û li gor şert û mercên navneteweyî yên cîhanê ku mafên mirovî tên parastinê, tevbigerin.”
