Şirnex – Endamê Platforma Ekolojiyê ya Şirnexê Ahmet Başak diyar kir ku îhaleyên birîna daristanan bi destê Walîtiya Şirnexê pêk tên û birîna daristanan jî cerdevan dikin.
Li Şirnex û navçeyên wê bi salan e xweza tê talankirin û di salên dawî de li çiyêyen weke Cûdî, Heftenîn, Gabar, Herekol, Komate û Herêma Besta daristan tên birîn. Ji bo rawestandina birîna daristanan û talankirina xwezaya Şirnexê, Platforma Ekolojiyê ya Şirnexê 29ê Tîrmehê dest bi kampanyeya îmzeyan kir. Endamê platformê Ahmet Başak got ku armanca çalakiya wan pêşîgirtina talana xwezaya Şirnexê ye.
Walîtiya Şirnexê îhaleya birîna daristanan pêk tîne
Başak bal kişand ser qedexeyên ku ji aliyê Walîtiya Şirnexê ve li ser herêmê tên meşandin û wiha got: “Li herêma Şirnex daristan zêdetirî 5 sal in tên birîn. Walîtiya Şirnexê jî her 15 rojan carekê bi hinceta ewlehiyê qedexeyê datîne ser herêmekê û em dizanin dema ev qedexe dest pê dike li wê herêmê birîna daristanan tê kirin û leşker ewlehiya van kesan digirin.”
‘Destpêkê bi hinceta ewlehiyê daristan dibirîn niha ji bo rantê dibirin’
Başak destnîşan kir ku cerdevan û derdora wan ji bo rantê daristanan dibirin û axaftina xwe wiha berdewam kir: “Li ser axa Kurdistanê bi salan e şerek taybet tê meşandin. Heya îro bi hinceta li derdora qeleqolan ewlehî tuneye daristan dihatin birîn lê niha ev talan ji asta ewlehiyê derbas bûye û ketiye asta rantê. Ji bo birîna daristanan îhale tên kirin. Ev îhale bi destê Walîtiya Şirnexê pêk tên û bi deste cerdevanan tên birîn. Piştî ku daristanan dibirin dibin bajarên Tirkiyeyê û li ser medyaya civakî em parvekirinên firotina êzingan dibînin.”
Banga xwedîderketinê
Başak herî dawî bang li gelê Şirnexê kir ku xwedî li xwezayê derkevin û axaftina xwe wiha bi dawî kir: “Armanca me ew e ku bi çalakiyên xwe, em qirkirina xwezaya Şirnexê bidin sekinandin. Di nava gel û saziyan de nerazîbûnek heye. Em bang li hemû gelê Şirnexê dikin ku li dijî talana xwezaya Şirnexê bertek nîşan bidin û piştgiriyê bidin xebatên ji bo pêşîgirtina talana tê kirin.”
