Mamoste û Rêveberên Komeleya Avestayê, bertek nîşanî mohrkirina deriyê komeleyê dan û banga piştevaniyê kirin.
Duh bi fermana Walîtiya Îzmîrê 2 zabiteyên Şaredariya Konakê çûn li Komeleya Lêkolînên Ziman û Çandê ya Avestayê û deriyê komeleyê mohr kirin. Têkildarî mijarê ji mamosteyên komeleyê Çeçen Topçû axivî. Çeçen Topçû bertek nîşanî mohrkirina saziya Ziman û Wêjeyê da û wiha got: “Beriya her tiştî ev biryara mohrkirinê polîtîk e. Helwesta li dijî zimanê Kurdî, helwesteke polîtîk e. Saziyên me heya niha bi dehan hincetan hatine girtin. Ev ne cara yekem e û ev ne dawî ye jî.”
Çeçen Topçu bal kişand ser kevneşopiya têkoşîna ziman û çandê û axaftina xwe wiha domand: “Bila baş bê zanîn ku gelê Kurd heya niha ji bo çand û zimanê xwe gelek berdel dan, ji niha û pê de jî çi hewce bike dê bê kirin. Zimanê me xeta me ya sor e.”
Çeçen Topçû diyar kir ku ew ê di zimanê Kurdî de bi israr bin û wiha pê de çû: “Em ê li ser vê xetê tim israr bikin. Sibê saet di 11.00an de, ji bo vê bêhiqûqiyê şermezar bikin, em ê li pêşiya deriyê saziya xwe daxûyanî bidine çapemeniyê.” Çeçen Topçu bang li hemî aliyên demokrat, şagirt, endam, rêvebir û welatparêzan kir û daxwaza piştevaniyê kir.
Her wiha Hevserokê Saziya Çand û Ziman a Avestayê Ramazan Kaygisiz jî bertek nîşanî mohrkirina komeleyê da û ji bo daxûyaniya sibê banga piştgiriyê kir.
