Şirnex – Dayikên Aştiyê, rêxistinên DBPê û DEM Partiyê yên Şirnex û navçeyên wê di pêşengtiya MEBYA-DER a Botanê de, bi girseyî serdana şîna endamên HPGê Abbas Kerîm Vesek û Haci Ertene kirin.
Navenda Ragihandina û Çapemeniyê ya Hêzên Parastina Gel (HPG) duh aşkere kir ku endamên wan Haci Ertene (Baran Cizîr) di 4ê Tebaxa 2017an de û Abbas Kerîm Vesek (Hasan Viyan) di 14ê Kanûna 2017an de li Herêmên Parastina Medyayê di şer de jiyana xwe ji dest dane. Li ser vê yekê Malbatên Ertene û Vesek li navçeyên Hezex û Cizîrê yên Şirnexê ji bo zarokên xwe şîn danîn. Meclisa Dayikên Aştiyê, rêxistinên Partiya Herêmên Demokratik (DBP) û Partiya Wekhevî û Demokrasiyê ya Gelan (DEM Partî) ên Şirnex û navçeyên wê di pêşengtiya Komeleya Yekitî Çand Piştevanî û Alîkariyê ya bi Malbatên Xizmên xwe li Derguşa Şaristaniyê Windakirinê re (MEBYA-DER) de bi girseyî serdana şînê kirin.
Girsê di serî de serdana şîna Abbas Kerîm Vesek a malbata wî li Mala Şînê ya Taxa Nû ya navçeya Hezexê hatibû danîn kirin. Girse bi berzkirina dirûşmeyên “Şehîd namirin” derbasî cihê şînê bû. Di şînê de ewilî ji bo cangoriyên azadî û demokrasiye deqîqeyek rêz hat girtin û pişt re dua hatin kirin.
‘Em bi saya van şehîdan gihiştin vê merheleyê’
Rêvebera MEBYA-DERê Xane Babat a di şînê de axivî, ji malbatê re sersaxî xwest û piştgiriyên xwe anîn ziman. Pişt re jî Hevserokê DEM Partî yê Şirnexê Ramazan Ûysal axivî û bal kişand ser pêvajoya Aştî û Civaka Demokratîk a Rêberê Gelê Kurd Abdullah Ocalan daye destpêkirin û wiha got: “Em bi saya van şehîdan gihiştin vê merheleyê. Em hevî dikin edî hêsirên çavên dayikan nerijin û aştî û wekhevî were welatê me.”
‘Em serbilind in’
Pişt re jî bavê Abbas Kerîm Vesek, Yûsûf Vesek axivî û destnîşan kir ku ew bi kurê xwe serbilind in û wiha got: “Ev şehadet di encama înkarê de derketin holê. Edî bila tu kes ji ber ziman, nasname, reng, zayend û baweriya xwe neyê înkarkirin ne li welatê min ne jî li welatekî din. Bi têkoşînê înkar ji holê rabû edî dema aştî û wekheviyê ye. Rêxistina me rêxistineke gerdûnî ye. 50 sal berê çi digot niha jî heman tiştî dibêje. Aştî, wekhevî û demokrasiyê dixwaze. Em hemû kesên di vê rê de jiyana xwe ji dest danê bi rêz û hurmet bi bîr tînin.”
Bi girseyî serdana şînê kirin
Piştî xwendina duayan girsê serdana şîna Haci Ertene ku malbata wî li taxa Banêsenefîs (Yafes) a navçeya Cizîrê hatibû danîn. Girse bi berzkirina dirûşmeyan derbasî mala şînê bûn. Girsê heta mala şînê meşiya û dirûşmên “Şehîd namirin” , “Bijî Serik Apo” , “Ey şehîd xwîna te rê ya me ye” berzkirin. Li mala şînê ji bo cangoriyên azadî û demokrasiye deqîqeyek rêz hat girtin.
Pişt re jî Dayika Aştiyê Esmer Kaçmaz axivî û ji malbatê re ser saxî xwest.
Bavê Haci Ertene, Nîmet Ertene axivî û ji bo serdanê spasiya girseyê kir û ev tişt anîn ziman: “Em hevî dikin bibe şehîde dawiyê. Bibe şehîde aştî û demokrasiyê û edî dayik negirîn.”
‘Divê dewlet li gor rihê pêvajoyê tevbigerê’
Piştî serdana şînê girse ber bi Mala Şînê ya Banêsenefîs meşiyan û li dijî destûr nedayina şînê bertek nîşanî mufiyê Cizîrê dan. Girse bi berzkirina dirûşmên, “Şehîd namirin” hatin ber Mizgefta Haci Taham û li vir daxuyanî hate dayîn. Di daxuyaniyê de Hevserokê DEM Partiyê yê Cizîrê Yılmaz Sanri axivî û destnîşan kir ku tevî qala pêvajoya aştiyê tê kirin jî saziyên dewletê li gorî ruhê pêvajoyê tevnagerin û nedayîna destûra mala şînê şermezar kir. Yilmaz Sandi xweset ku dewlet li gor rihê pêvajoyê tevbigere.
Daxuyanî bi çepikan bi dawî bû.
