Amed – Endama Platforma Yekîtiya Jinên Kurd Laleş Bîçîmlî naverok û encama konferansa jinan nirxand û diyar kir ku ev konferansa wan dê bibe lingê kongreya neteweyî û dê di demek nêzîk de kongreya neteweyî ya jinan li dar bixin.
Konferansa Platforma Yekîtiya Jinên Kurd a 3yemîn a bi dirûşma “Bi Yekîtiya Jinên Kurd Ber bi Yekîtiya Neteweyî ve” di 21 û 22yê Hezîranê de li Amedê hate lidarxistin. Parlamenter, hevşaredar, hunermend, kesayet, nûnerên partiyên siyasî û saziyên sivîl ên civakî di nav de ji bakurê Kurdistan û Tirkiyeyê gelek jin beşdarî konferansê bûn. Di konferansê de jinan çar kargeh li dar xistin. Jinan di Kargeha Hozan Mizgîn de mijara “Di parastina çanda Kurdî de rol û mîsyona jinan”, di Kargeha Şîrîn Elemhûlî de mijara “Di parastin û pêşxistina zimanê Kurdî de rol û mîsyona jinan”, di Kargeha Ferda Cemîloglû de mijara “Di avakirina aştî û civaka demokratîk de rol û mîsyona jinan” û di Kargeha Jîna Emînî de mijara “Li dijî î her cureyê tundî û qirkirina li ser jinan rêbazên têkoşînê” nîqaş kirin. Konferans bi eşkerekirina encamnameyê di roja duyemîn de bi dawî bû.
Endama Platforma Yekîtiya Jinên Kurd Laleş Bîçîmlî naverok, encam û girîngiya konferansê nirxand û destnîşan kir ku dê di demek nêzîk de kongreya neteweyî ya jinan li dar bixin.
‘Konferansê hêzek da me’
Laleş Bîçîmlî, diyar kir ku bi hêviya ku dê yekitiya jinan yekitiya neteweyî bi xwe re bîne konferans li dar xistin û wiha got: “Platformê beriya niha du konferans li dar xistibûn. Bi vê konferansê me xwest em xwe bigihînin jinên li bakurê Kurdistan û Tirkiyeyê. Em derd û dermanê jinan bînin ziman û çareseriyekê bibînin. Ev jî bi yekitiya jinan pêkan e. Gihişt armanca xwe jî ji ber ji çar aliyê Tirkiyeyê û Ji ber ku ji bakurê Kurdistanê û Tirkiyeyê tevlibûneke xurt çêbû. Ne tenê yekîtiya jinan yekitiya hemû gelê Kurdistanê me armanc kiriye. Konferansê hêzek da me bi vê hêzê jî em xurttir bûn. Me di vê konferansê de dît ku jinên Kurd dikarin bên bahev dikarin ji derdên xwe re çareseriyê jî bibînin. Vê yekê jî em keyfxweş kirin.”
‘Divê êdî aştî mayînde bibe’
Laleş Bîçîmlî destnîşan kir ku jin dikarin aştiyê ava bikin û wiha domand: “Aştî ji bo me derman e. Em êdî naxwazin li tu cihekî dinyayê tu kes jiyana xwe ji dest bide. Em weke jin weke dayîk dibêjin êdî bes e. Divê aştî hebe ev aştî mayînde bibe. Divê aştî were mayîndekirin. Heke yekîtiya neteweyî çênebe her baskek kêm e. Di vir de armanca me yekitiya neteweyî bû. Ez bawer im ev konferans dê bibe lingê kongreya neteweyî. Em her gaveke xwe ji bo kongreya neteweyî diavêjin. Ev konferans bû bingeheke wê.”
‘Tişta herî girîng ji bo me yekîtiya neteweyî ye’
Laleş Bîçîmlî têkildarî gotina Rêberê Gelê Kurd Abdullah Ocalan a “Divê jin pêşengtiya vê pêvajoyê bikin” ev tişt gotin: “Em Rêberê Gelê Kurd vala dernaxin. Em vê weke dirûşmekê ji xwe re dibînin. Ji ber wê jî me gelek tişt danîne pêşiya xwe ya herî girîng niha ji bo me yekîtiya neteweyî ye. Ev ji bo me xala herî girîng e. Em ê bibin xebatkarê vê pêvajoyê. Ev pêvajo ji gelê Kurd re gelekî girîng e. Divê gelê Kurd û her jin ji bo vê xebata neteweyî bixebite da ku da ku kongreya neteweyî li dar bikeve û çar aliyê Kurdistanê bi awayekê bibe yek ku gotina wî jî yek be û yek deng derkeve. Yekdengiya gelê Kurd ji bo me gelekî girîng e. Em vê weke dirûşmekê ji xwe re dibînin.”
‘Divê em bi rol û mîsyona xwe gelekî baş rabin’
Laleş Bîçîmlî bal kişand ser pêvajoya heyî ku bi banga “Aştî û Civaka Demokratîk” a Rêberê Gelê Kurd dest pê kir û wiha pê de çû: “Di vir de rol û mîsyona jinan gelekî girîng e. Barekî giran li ser mile jinan e. Jin aştîxwaz in. Divê em di vê pêvajoyê de bi rol û mîsyona xwe gelekî baş rabin. Em ji bo aştî û aramiyê xebatên xurttir bikin. Ji niha pê ve jî ji bo aştî û aramiyê çi ji destê me bê em ê bikin û xurttir tev li xebatan bibin.”
‘Armanca me ew e ku em kongreya neteweyî li dar bixin’
Laleş Bîçîmlî da zanîn ku xebatên wan niha ji bo Kongreya Neteweyî hene û axaftina xwe wiha bi dawî kir: “Armanca me ew e ku em çar aliyê Kurdistanê bigihînin hev û kongreya xwe li dar bixin. Em ê kongreya neteweyî ya jinan li dar bixin. Başûr, Rojava, Ewropayê konferansa xwe li dar xistibûn me jî ya xwe pêk anî. Em di têkiliyê de ne. Ji ber wê em ê bigihin hev û kongreyekê li dar bixin. Em dengê jina Kurd derxin holê. Em bi hev re diaxivin. Em çûn Başûr jî me li wir jî xebatek kir. Xebata me encameke baş jî girt. Pey wê re konferans pêk hat. Ji Rojava jî beşdar bûn çêbû. Em êdî ji kongreya netewî ya jinan re amade ne. Dem û cih ne diyar e lê dê di demek nêzîk de were lidarxistin.”
