Saziyên mafê mirovan û hiqûqê der barê welatiyên ku ji Bakurê Kurdistanê ne û li Herêma Kurdistanê girtî ne de li avahiya Şaxa ÎHDa Amedê daxuyanî dan. Saziyan xwest ku divê Herêma Kurdistanê têkildarî rewşa girtiyan agahî bide malbatên girtiyan û saziyan.
Şaxa ÎHDa Amedê, Baroya Amedê, MED TUHAD-FED, Şaxa OHDa Amedê û MEBYA-DERê der barê welatiyên ku ji Bakurê Kurdistanê ne û li Herêma Kurdistanê girtî ne de li avahiya Şaxa ÎHDa Amedê daxuyanî dan. Malbatên girtiyan ku ji bajarên bakurên Kurdistanê û Tirkiyeyê yên cuda hatibûn, Hevseroka Giştî ya OHDê Ekîn Yeter û nûnerên saziyên sivîl ên civakî beşdarî daxuyaniyê bûn.
Metna daxuyaniyê ya bi Kurdî Hevserokê Şaxa OHDa Amedê Mûhîttîn Mûgûç xwend. Mûhîttîn Mûgûç da zanîn ku ji destpêka sala 2025an û vir ve şaxên cuda yên ÎHDê û OHDê gelek serlêdan ji welatiyan wergirtine ku dibêjin ew derbarê çarenûsa hin xizmên xwe de xwedî agahî nînin û wiha got: “Di serlêdanên ku hatine kirin de, endamên malbatan diyar kirine ku ji bilî agahdariya devkî derbarê rewşa xizmên wan de ti agahî li cem wan tune ne. Ji ber zêdebûna hejmara serlêdanên ku di nav wan de ne, pêwîstiya dayîna vê daxuyaniyê derketiye holê.”
Mûhîttîn Mûgûç diyar kir ku malbatan di serlêdanên hatine kirin de ev agahî bi wan re parvekirine: “Wan ji me re gotine ku ew bi teqezî nizanin ka xizmen wan sax in an na, hin agahiyên ku malbatan wergirtine nîşan didin ku xizmên wan li Herêma Kurdistanê jiyana xwe ji dest dane û carinan kesên ku tê gotin jiyana xwe ji dest dane li girtîgehên başûren Kurdistanê tên wergirtin. Ev rewşa ne diyar ji bo endamên malbatê bê bersiv maye.
‘Bila malbat bi rêya bangê werin agahdarkirin’
Endamên malbatê hêvî dikin ku, ger xizmên wan sax bin û di zindanên başûrê Kurdistanê de bin, bi rêya vê bangê werin agahdarkirin. Di rewşa ku xizmên wan di zindanê de bin, welatiyên serlêder maf hene ku bizanin û bipirsin ka ew bi kîjan sûcdariyan têne girtin an mehkûmkirin. Gelo xizmên wan bi awayekî bi bandor mafên xwe yên parastin û darizandina dadperwer bikar tînin û gelo hewcedariyên wan ên kesane di zindanên ku xizmên wan lê têne girtin de têne bikaranîn.
Di seranserê dîrokê de, mirovan bi rê û rêbazên neasayî jiyana xwe ji dest dane an jî winda bûne. Dema ku kesek winda dibe, rewşek ne diyar ji bo malbat û xizmên wan derdikeve holê. Ev rewşa ne diyar bandorên neyînî yên psîkolojîk û giyanî, nemaze li ser kesên ku li pey xwe mane, dike. Ji ber vê sedemê, endamên malbatê mafê wan heye ku çarenûsa xizmên xwe bizanibin.”
Banga li Wezareta Dadê ya Herêma Kurdistanê
Mûhîttîn Mûgûç axaftina xwe bi van gotinan bi dawî kir: “Nameya agahdariyê ya berfireh a derbarê serlêdanên welatiyan ji rêxistinên hiqûqî û mafên mirovan re, dê ji hêla saziyên ku ev metîn îmze kirine ve bi Wezareta Dadê ya Herêma Kurd a Iraqê re were parvekirin û li ser daxwaza malbatan, banga me ji Herêma Kurd a Iraqê re wiha ye:
Agahdarkirina saziyan û malbatan
“Pêşî, em daxwaz dikin ku malbatên serlêder û em, saziyên bang kirine, werin agahdarkirin ka xizmên wan li Herêma Kurd a Iraqê ne û heke hebin, di çi şert û mercan de dijîn. Ger navên ku ji hêla serlêderan ve hatine dayîn di girtîgehên Herêma Federal a Kurd a Iraqê de bin, ew li kîjan girtîgehê û çima têne girtin, şert û mercên girtîgehê çi ne, rewşa wan a yasayî di çi qonaxê de ye û rewşa wan a tenduristiyê çi ye.”
