1emîn Rojên Pirtûkan ya bi hevkariya YEWKURD û Şaredariya Bajarokê Xefleliyê tê lidarxistin, dest pê kir.
1emîn Rojên Pirtûkan ku bi hevkariya Yekîtiya Weşangerên Kurd (YEWKURD) û Şaredariya Xelfelî hatiye organîzekirin, li bajaroka Xelfelî yê Îdirê dest pê kir. Rojên pirtûkan ku li Daristana Bajêr dest pê kir, dê 4 rojan berdewam bike. 17 weşanxaneyên kurd beşdarî rojên pirtûkan bûn.
‘Parastina pirtûkan erka me hemûyan e’
Parlamenterê DEM Partiyê yê Îdirê Yilmaz Hun di vekirina fuarê de axivî û hemû şêniyên bajêr vexwend fuara pirtûkan. Hevserokê YEWKURDê Hakki Boltan jî diyar kir ku weşanxaneyên ji gelek bajaran beşdarî vê fuarê bûne. Hakki Boltan wiha got: “Ji ber ku parastina pirtûkan tê wateya xweparastinê, lewma fuarên bi vî rengî pir girîng in. Dema ku em dixwînin, em nasnameya xwe nas dikin. Ji ber vê sedemê, parastina pirtûkan ne tenê erkê weşanxaneyan e, erkê me hemûyan e.”
‘Zexta herî mezin li ser kurdî ye’
Hakki Boltan, behsa zextên li ser zimanê Kurdî kir û wiha bi dawî kir: “Zexta herî mezin li ser zimanê Kurdî ye. Ji bo demek dirêj, bikaranîna yek peyva kurdî jî qedexe bû. Ziman ji bo gelê Kurd qedexe bû. Ji ber vê sedemê gel ji zimanê xwe hate dûrxistin. Ji ber vê yekê ev xebata ku îro tê kirin pir girîng e.”
