DTSO li gel Weqfa Mezopotamyayê dê nêzî 5 hezar têgehên Kurdî yên aboriyê berhev bike. Rêveberê DTSO Farûk Korkmaz têkildarî xebata xwe wiha got: “Divê em bi zimanê xwe karên xwe bimeşînin. Divê hemû sazîyên me ji xwe re vê yekê bikin armanca yekemin.”
Odeya Pîşesazî û Bazirganiyê ya Amedê (DTSO) ji bo bikaranîna Kurdî di warê aborî, bazirganî û cîhana karsaziyê de xurt bike, xebateke berfireh a termînolojiyê da destpêkirin. Bi protokola ku bi Weqfa Mezopotamyayê re hate îmzekirin, nêzî 5 hezar peyvên aboriyê wê li ser bingeha Kurdî (kurmancî) dest bê girtin û li gel zimanê Tirkî, Farisî, Erebî û Îngilîzî wê “Ferhenga Têgehên Aborî ya Kurdî” ya bi 5 zimanî bê amadekirin.
Ji aboriyê heta fînansê, ji hilberînê heta bazirganiyê bi hezaran têgehên ku cîhana karsaziyê bi kar tîne dê bi xebata akademîsyen û pisporên ziman, Kurdî bibe xwedî terminolojiyeke dewlemend. Bi xebata ku ferhengên aborî yên navneteweyî wê bêne lêkolînkirin, tê armanckirin ku Kurdî di jiyana aborî de bibe xwedî qadeke bikaranînê ya xurtir û standart.
Rêveberê DTSOyê Farûk Korkmaz derbarê projeya Ferhenga Têgehên Aboriyê ya Kurdî ajansa me re axivî.
‘Nêzî 5 hezar û 7 peyvên aboriyê hatin komkirin’
Farûk Korkmaz anî ziman ku xebatên xwe yên DTSOyê bi zimanê Kurdî û Tirkî dimeşînin û got: “Odeya Bazirganiyê her du zimanan bi hev re dimeşîne. Di vir de me kêmasiyek dît, valahiyek dît. Valahî çi bû? Di peyvên aboriyê de kêmasiyek mezin me dît. Di vî warî de heta niha li çar perçeyên welat xebateke akademîk an jî xebateke çapkirinê nehatiye meşandin. Nêzî saleke bi Weqfa Mezopotamyayê re em xebatê dimeşînin. Me li Wanê komxebatek li dar xist. Li gorî encama vê komxebatê, çarçoveya vî karî derket holê. Çi bû ev? Nêzî 5 hezar û 7 peyvên aboriyê hatin komkirin.”
‘Di xebata aboriya Kurdî de gelek kes dê cih bigirin’
Korkmaz di berdewama axaftina xwe de diyar kir ku wan xebata ferhengê nêzî salek û nîvan meşand û got: “Piştî komxebata me ya li Wanê, paşê me li Amedê du yan jî sê caran komxebat bi hev re meşand. Du caran li Stenbolê û li Başûr jî em xebatek bi vî awayî dimeşînin. Lê bajarên çar perçeyên welat, kesên ku di vî warî de berê xebat meşandine, di vê xebata me de dê cih bigirin, em ê ji wan alîkariyê bistînin. Dîsa kesên derveyî welat dijîn, li Ewropayê û diasporayê dijîn, em ê ji wan jî alîkariyê bistînin. Armanca me ew e ku di warê aboriyê de, di warê Kurdiya aboriyê de standardîzasyonekê derxin holê. Em bi vê armancê xebatan dimeşînin.”
‘Divê di hemû qadên jiyanê de xebatên ziman bêne meşandin’
Korkmaz xwest ku ne tenê di qada bazirganiyê de, divê di hemû qadên jiyanê de xebatên ziman bên meşandin û axaftina xwe wiha bi dawî kir: “Divê em bi zimanê xwe karên xwe bimeşînin. Bi vî awayî divê hemû sazîyên me ji xwe re bikin armanca yekemîn. Ez bawer im di pêşerojê de jî ev ziman dîsa bikeve nav bazara me. Ji ber ku ji bo ziman, ji bo pêşeroja ziman ev tişt hewce ye.”
