Amed – Serokê YEWKURDê û xwediyê Weşanên Aramê Hakki Boltan ku li ser Rojên Pirtûkên Kurdî yên li Amedê dest pê kirin axivî, destnîşan kir ku armanca xebata wan pêşxistina zimanê Kurdî ye.
Rojên Pirtûkên Kurdî ku bi hevkariya Şaredariya Bajarê Mezin a Amedê û Yekitiya Weşangerên Kurd (YEWKURD) di çarçoveya 15ê Gulanê Cejna Zimanê Kurdî de li Qada Şêx Seîd a li navçeya Yenîşehîr a Amedê tê lidarxistin duh dest pê kir. Nêzî 35 weşanxane û saziyên çand û ziman ên weke MED-DER, SOZ-DER û Ma Mûsîcê jî tev li Rojên Pirtûkên Kurdî yên ku dê heta 1ê Hezîranê roja yekşemê bidome bûn. Hevserokê YEWKURDê û xwediyê Weşanên Aramê Hakki Boltan li ser Rojên Pirtûkên Kurdî ji ajansa me re axivî.
Hakki Boltan diyar kir ku bi armanca weşangerên kurd pirtûkên ku derdixînin bigihînin xwînerên xwe ev rojên pirtûkan li dar xistin e û wiha got: “Armanc ew e ku em xwendina zimanê kurdî, hişmendiya Kurdî bi rêya pirtûkan ji raya giştî ya Kurdan re ragihînin. Ev xebat ne tenê bi hevkariya YEWKURD û Şaredariya Bajarê Mezin di heman demê de bi piştgiriya sazî û dezgehên sivîl pêk tê. Em ji bo piştgiriya wan spasiyên xwe pêşkeş dikin. Hêvî dikim ku ev xebat ji bo pêşketina zimanê Kurdî dê bibe derfetek.”
‘Ev cerebe dê di pêşerojê de ji me re bibin tecrube’
Hakki Boltan bi bîr xist ku Rojên Pirtûkên Kurdî yên ewil li Mêrdînê li dar xistin û wiha berdewam kir: “Li Mêrdînê pêşengeheke baş çêbû û xûrt derbas bû. Tevlibûneke zêde ya gel çêbû. Ji bo zimanê kurdî baş bû. Pişt re jî me li Erxeniyê rojên pirtûkan li dar xist. Organîzeyeke pir baş bû. Hemû weşanxaneyên ku beşdar bûn ji vê yekê memnûn bûn. Xwîner keyfxweş bûn. Bertekên erênî hatin. Ev jî rojên pirtûkan a sêyemîn e em li dar dixin. Wê ev cerebe di pêşerojê de ji me re bibin tecrube. Em ê vî karî bi pêş ve bibin. Dora 35 weşanxaneyan tev li rojên pirtûkan bûne. Sazî û dezgehên sivîl hene. Hêvî dikim ku beşdarbûneke xurt pêk were û gel ji vê xizmetê sûdê bigire.”
‘Ev pêşengeh ji bo weşanxaneyan nefesek e’
Hakki Boltan destnîşan kir ku Weşanxaneyên Kurdî di bin ambargoyeke berfireh a desthilatê de ne û wiha dirêjî da axaftina xwe: “Bi taybetî Weşanxaneya Aramê û çend weşanxaneyên din hemû weşanxaneyên kurdî di bin ambargo û hedefa desthilatê de ne. Destûr nayê dayîn ku pirtûkeke Kurdî bi awayekî rehet li piyaseya serbest were firotin û piştgirî were dayîn. Ji ber wê yekê ev pêşengeh ji bo weşanxaneyan nefeseke. Ji vir û şunde jî ji bo ji weşanxaneyan re derfet bê afirandin em ê li bajar û navçeyên Kurdistanê di vê çarçoveyê de bi awayekî pêşxistî em ê rojên pirtûkan li dar bixînin.”
‘Hemû xebatên me dê bi ruhê roja zimanê Kurdî bên kirin’
Hakki Boltan da zanîn ku Rojên Pirtûkên Kurdî dê di çarçoveya 15ê Gulanê Cejna Zimanê Kurdî de di navbera 15-19ê Gulanê de bihata lidarxistin lê ji ber pêvajoya siyasî hate taloqkirin û wiha pê de çû: “Ji xwe armanca vê xebatê pêşxistina zimanê Kurdî ye. Ji ber vê ew roj hatibû hilbijartin. Rojek tenê têra roja zimanê Kurdî nake. Weke vê xebatê û hemû xebatên em ê bikin dê bi ruhê roja zimanê Kurdî bên kirin.”
Divê berhemên Kurdî bên xwendin
Hakki Boltan ji bo Rojên Pirtûkên Kurdî ev bang kir: “Gel, Kurdîhez, xwîner û yên dixwazin ev bajar bibe bajarekî kurdewar divê xwedî li van xebatan derkevin, van berheman bixwînin xwe bi pêş ve bibin. Derbarê hişmendî û nivîsandinê de jî xwe tev li van xebatan bikin û weke ronesanseke Kurd a vê demê bi pêş ve bikeve û serbikeve.”
