DEM Partiyê têkildarî hevdîtina li gel MHPê daxuyanî da û hat gotin ku di civînê de li ser mijara erk û berpirsiyariya Meclisê ya di warê çareserkirina pirgirêka Kurd de hatiye axivîn.
Hevserokên Giştî yên DEM Partiyê Tuncer Bakirhan û Tulay Hatimogûllari bi Serokê Giştî yê MHPê Devlet Bahçelî re li Meclisê hevdîtinek pêk anîn. Hevdîtin 40 deqîqe berdewam kir.
DEM Partiyê piştê hevdîtinê daxuyaniyek nivîskî belav kir.
Daxuyaniya DEM Partiyê bi vî rengî ye:
“Civîna ku di derbarê geşedanên li Tirkiye û herêmê de nirxandinên berfireh pêk hat, di atmosfereke pir avaker de derbas bû. Di hevdîtinê de geşedanên piştî Banga Aştî û Civaka Demokratîk, pêvajoya demokratîkbûna Tirkiyeyê, hevdîtina Şanda DEM Partiyê ya Îmraliyê bi birêz Abdullah Ocalan re û biryarên kongreya 12emîn a PKKê ku di 12ê Gulanê de ragihandibû, hatin nirxandin. Di civînê de mijarên weke gavên ku ji bo pêvajo li pêş bikeve divê bên avêtin, rola Meclisê, pakêta nû ya darazê, komîsyona ku tê payîn li Meclisê bê avakirin û qanûna bingehîn hatin nirxandin. Hate destnîşankirin ku weke ku Bahçelî jî bang kir li TBMMê komîsyoneke xwedî bi erk û bi rêbazeke ku hemû partiyên siyasî tev li bibin bê avakirin da ku ev partiyên siyasî dikaribin bi rola xwe rabin. Daxilbûna partiyên siyasî ji bo vê pêvajoya krîtîk gelek girîng e.”
