Bi pêşêngiya DBPê li Şirnexê li dijî êrişên Tirkiyeyê yên li ser Rojava daxuyanî hat dayin. Di daxuyanî de bang li raya giştî ya navneteweyî hat kirin ku deng bidin Rojava.
Partiya Herêmên Demokratik (DBP), Tevgera Jinên Azad (TJA) û Partiya Wekhevî û Demokrasiyê ya Gelan (DEM Parti), li dijî êrişên Tirkiyeyê û komên çete yên bi ser wê ve yên li dijî bajar û navçeyên rojavayê Kurdistanê li ber avahiya DEM Partiya Şirnexê daxuyanî dan. Endam û nûnerên saziyên sivîl û gelek kes tev li daxuyaniyê bûn. Di daxuyaniyê de pankarta ku li ser “Rojava rûmeta me ye” hilgirtin. Girseyê bê navber dirûşmeya, “Bijî berxwedana Rojava” berz kirin.
Metna daxuyaniya hevpar ji aliyê Hevserokê DEM Partî yê Şirnexê Abdullah Gungen ve hat xwendin. Abdullah Gungen anî ziman ku, piştî têkçûyina rejîma baas pêvajoyeke nû li Suriyeyê destpêkiriyê û got ku çareseriya pirsgirêkên Suriyeyê û Rojhilata Navîn demokrasiyê. Abdullah Gungen bal kişand êrişên li ser herêmên Bakur û Rojhilatê Suriyeyê û axaftina xwe wiha domand: “Li gel tevî daxwaz û bangewaziyên çarenûsa demokratîk, di vê pêvajoyê de jî li dijî Rojava êrîş pêk tên. Bi taybet ji 27’ê Mijdarê vir ve li dijî Rojava konsepteke nû ya şer ketiye meriyetê. Em baş dizanin ku bi êrîşan modela Rojava hedef tê girtin. Di bingeha van êrîşan de jiyana demokratîk û azad a ku bi modela Rojava ketiye meriyetê cig digre. Her wiha, bi êrîşan ruhê têkoşîna enternasyonalîst hedef tê girtin. Li gel van armancan, sedema herî bingehîn a van êrîşan jî statuya Rojava ye. Lewre, Rojava Şoreşa gelan û nasanameya jinan e.”
‘Parastina Rojava divê bibe peywîra me ya sereke’
Abdullah Gungen bi lêv kir ku bi hedef girtina statûya Rojava re daxwaza demokrasî û azadiyê hedef tê girtin û wiha got: “Feraseta Netew-Dewletî baş dizane ku Rojava bi paradigma û modela xwe ji pirsgirêkên Modernîteya Kapîtalîst re çarenûsa bingehîn e.Li hember vê konseptê, wek DBP, em ê tu caran bê deng neminin. Ji bo parastina Rojava û destkeftiyên gelê Kurd, em ê bi tevî hêzên xwe li ber xwe bidin. Di vê çarçoveyê de em ê li tevî deveran bi rêxistin û saziyên xwe yên demokratîk re têkoşîna xwe mezin bikin. Divê neyê jibîrkirin ku, xwedîderketina Rojava ne tenê barê gelê Kurd e. Li hember siyaseta şer û polîtîkayên qirkirinê divê gelên Tirkiye û cîhanê bibin xwedî berpirsyar. Lewre, di şexsê Rojava de hêviya azadiyê ya gelan hedef tê girtin. Ji ber vê yekê jî parastina modela Rojava divê ji bo me bibe peywir û berpirsyariyeke dîrokî. Bi vê mabestê em bang li hêzên demokratîk û navnetewî dikin ku, li hember êrîşên li dijî Rojava bê deng neminin. Ji bo siyaseta şer û êrîşên dagirkeriyê rawestin bikevin nav liv û tevgeran. Banga me ew e ku, li dijî şer sekneke zelal bimeşînin û deng bibin dengê Rojava. Divê tevî hêzên demokratîk û navnetewî xwedî li Rojava derbikevin. Lewre, Rojava bi berdilên ku da li hember hovitiya DAÎŞ’ê di parastina jin, zarok û gelên Sûriyê de roleke girîng lîst. Bi berxwedana xwe taritiya sedsalê perçe kir. Ji ber van sedeman parastina Rojava divê bibe peywira me ye sereke. Divê neyê jibîrkirin ku, heke Rojava neyê parastin dê qetlîam û sûcên şer kûr bibin.”
Daxuyanî bi çepik û berzkirina dirûşiman bi dawî bû.
