Berdevka Ragihandina YPJê Rûken Cemal diyar kir ku îdîayên ku dibêjin Minbic hatiye dagirkirin ne rast in û wiha got: “Li Minbicê destanek tê nivîsandin û berxwedaneke dîrokê tê meşandin.”
Berdevka Ragihandinê ya Yekîneyên Parastina Jin (YPJ) Rûken Cemal êrişên Tirkiyeyê û komên girêdayî wê yên li dijî Kantona Minbicê ji Ronahî TV re nirxand. Rûken Cemal pirsên pêşkêşvanê Ronahî TV Alan Meîş da û wiha got: “Li bajarê Til Temirê yê kantona Cizîrê balafireke bêmirov a bi tîpa “ANKA” ya Tirkiyeyê hatiye xistin.”
Teknîkên nû xistine dewrê
Rûken Cemal anî ziman ku ew ê bi teknîkên şer ên cuda bersivê bidin êrîşên li ser herêmên girêdayî Rêveberiya Xweser û wiha axivî: “Me teknîkên şer ên nû li dijî Tirkiye û çeteyên ku piştgiriya wê dike, xiste dewrê. ANKA ya ku li Til Temirê hat xistin nîşaneya vê yekê ye. Bi salan e propagandaya wê dikin û di komkujiyên li ser gelê me dihat bikaranîn. Bi van çekan bi dehan caran êrîşî hevalên me kirin. Ji niha û pê ve em mizgîniyê didin gelê xwe ku me li dijî SÎHAyan taktîkên nû pêş bixin.”
Rûken Cemal bal kişand ser êrîşên li dijî kantona Minbicê ku di 13 rojên dawî de zêde bûne û wiha got: “Li Minbicê ku bajarê berxwedanê ye û mozaîka gelan e, pevçûnên dijwar diqewimin. Tirkiye ku bi rojan e şer bi rê ve dibe, dixwaze bi komkujiyan bajêr bi dest bixe. Lê şervanên Meclisa Leşkerî ya Minbicê bi rojan destanan dinivîsin. Pevçûn heta vê saetê dewam dikin. Derbên mezin li çeteyan tê xistin. Hedefa yekemîn a çeteyan sivîl bûn. Bi dehan balafirên keşfê li esmanê bajarê Minbicê difirin. Gel bi van tê hedefgirtin. Ji ber ku li bejahiyê nikarin li hemberî şervanên me yên qehreman ti pêşketinan pêk bînin, bi êrîşên hewayî çep û rast êrîş dikin. Ev êrîş îro zêde bûne. Îro li Qereqozaq û Teşrînê pevçûnên dijwar qewimîn. Zêdeyî deh wesayîtên ku çete tê de bûn hatin rûxandin. Li her du cihan ji aliyê şervanên HSDê ve destan tên nivîsandin. Bi dehan çete hatin kuştin.”
Şervanên HSDê destanê dinivîsin
Rûken Cemal anî ziman ku nûçeyên di medyaya dîjîtal û çapemeniya nêzî hikûmetê de tên belavkirin ku îdîa dikin Minbicê di bin kontrola SMOyê de ye, ne rast in û wiha domand: “Li Minbicê li her qadê bersiva êrîşan tê dayîn. Hikûmeta Şamê li hemberî êrîşan di nava 13 rojan de hat hilweşandin, lê 13 roj in Minbic neketiye. Şervanên HSDê destaneke mezin dinivîsin. Li bajêr şerekî dijwar heye. Em ê bi ruhê fedayî heta dawiyê li ber xwe bidin. Li her derê bajêr êrîş hene, bersiva li dijî êrîşan pir mezin in. Li her derê derbên mezin li çeteyan tê xistin. Vîdeoyên ku tê de nîşan didin çawa şervanên HSDê li ber xwe didin hatin parvekirin. Van vîdeoyan rastiyê nîşan didin. Li her derê şervan li ber xwe didin. Li kolan û gundên Minbicê berxwedaneke dîrokî heye. Êrîş çiqas bidomin jî wê ev êrîş ji aliyê şervanên HSDê ve werin şikandin.”
