Dayika Şemê ya şengalî komkujiya ku DAIŞê li ser wan pêk aniye bi bîr xist û got: “Ew çeteyên DAIŞê yên ku êrîşê me kirin niha naveke din li xwe kirine û li rojavayê Kurdistanê êrîşê gelê Kurd dikin. Her çend wan navê xwe guhertibe jî rêbazên wan ên êrîşê yek in û feraseta wan heman e.”
Ji 27ê Mijdarê ve çeteyên Heyet Tehrîr El Şam (Cebhet El Nusra-HTŞ) êrişê Helebê û gundewarên wê dikin. Di encama êrîşan de niha piraniya Helebê di destê çeteyên HTŞê de ne. HTŞ piştî ku ket Helebê berê xwe da başarê Hemayê û gelek deverên din.
Di êrişên HTŞê de îşkence Kurdan û şêniyên herêmê tê kirin. Gelek kesên ku hewl didin xwe bigihînin nav Bakur û Rojhilatê Sûriyeyê di rê de dibin hedefa çeteyan. Gelek kesên ku di êrişên çeteyan de jiyana xwe ji dest didin li ser rêyan tên binaxkirin.
Her wiha di vê pêvajoya koçberiyên de gelek malbat ji hev diqetin û agahî ji hin endamên malbatê nayê girtin. Kesên ku niha ji ber êrîşên çeteyan neçarê koçberiyê bûne di nav zor û zehmetiyeke mezin de hewl didin xwe bigihînin herêmên bi ewle.
Em der barê ev êrişên ku pêk tên û trajediya ku tê jiyîn bi Dayika Şemê ya ku li Şengalê di êrişên çeteyên DAIŞê de ji 30 zêdetir endamên malbata wê hatibûn kuştin re axivîn.
Dayika Şemê di destpêka axaftina xwe de komkujiya ku di ssala 2014an de li Şengalê pêk hatibû bi bîr xist û ev tişt anî ziman: “Wek tê zanîn çeteyên DAIŞê li ser gelê Êzidî komkujiyeke pêk anîn û gelek tehdê li me kirin. Ew çeteyên DAIŞê yên ku êrîşê me kirin niha naveke din li xwe kirine û niha li rojavayê Kurdistanê êrîşê gelê Kurd dikin. Her çend wan navê xwe guhertibe jî rêbazên wan ên êrîşê yek in û feraseta wan heman e. Ev hişmendî duh li Şengalê û Efrînê komkujiyan kir û niha jî bi heman awayî li Helebê komkujiyan pêk tîne.”
‘Armanc tunekirin e’
Dayika Şemê got ku armanca êrişan komkujî ye û wiha axivî: “Ew çete dixwazin Gelê Kurd ji holê rakin, koka Êzidiyan bînin. Ev daxwaza tunekirinê daxwaza Dewleta Tirk e. Bi destê çeteyên DAIŞ û çeteyên ku niha navê HTŞê li xwe kirine li Bakur û Rojhilatê Sûriyeyê êrîşan pêk tînin dixwazin bigihîjin armanca xwe. Dixwazin Kurdên ku nikarin qir bikin jî bikin bin destê xwe û hemû qirêjahiyan li ser wan bimeşînin.”
Dayika Şemê wiha dirêjî da axaftina xwe: “Em wek Gelê Kurd tu carî van kiryarên wan qebûl nakin û serî li ber wan natewînin. Em ê hesabê 74 fermanên ku li ser Êzidiyan pêk hatine jî û hesabên ev komkujiyên ku li her parçeyên Kurdistanê pêk tînin jî bipirsin.”
‘Roja seferberiyê ye’
Dayika Şemê di dawiya axaftina xwe de wiha bang kir: “Divê îro ne tenê em Kurd hemû cîhan li dijî hovitiya van çeteyan rabin û nehêlin ku Kurd û neteweyên din ji cihên xwe koçber bibin. Her kesên ku ji xwe re dibê hîsên mirovbûnê bi min re heye divê li dijî vê êrîşê rabe ser xwe. Ji bo me îro roja seferberiyê ye divê em li gor wî tevbigerin da ku komkujiyên mezintir pêk neynê. Divê herkes bi berpirsiyarî rabe ser xwe. “
