Hevşaredarên Wanê Neslîhan Şedal û Abdullah Zeydan, li ser hesabên xwe yên Xê agahiyek parve kirin û diyar kirin ku qeyûm xebatkarên jin ên şaredariyê ji bo paqijkirina tuwaletan wezîfedar kiriye.
Piştî ku di 15ê Sibatê de qeyûm danîn ser Şaredariya Bajarê Mezin a Wanê, zextên li ser xebatkarên şaredariyê jî zêde bûn. Hevşaredar Neslîhan Şedal û Abdullah Zeydan bertek nîşanî vê rewşê dan û diyar kirin ku bi rêveberiya qeyûm re tayînên bêliyaqat hatine kirin, cihê û peywira personelan hatiye guhertin û bi taybetî jî karmendên jin sewqî karên angarya hatine kirin.
Hat îdiakirin ku personelên jin ên li Şaredariya Bajarê Mezin a Wanê dixebitin, ji bo paqijiyê şandine saziyên din ên girêdayî şaredariyê. Hat îdiakirin ku xebatkarên jin ji bo paqijkirina tuwalet û hin cihên din li saziyeke girêdayî walîtiyê hatine wezîfedarkirin û dema ku ev yek qebûl nekirin der barê wan de rapor hatiye girtin. Hevşaredarên Wanê Neslîhan Şedal û Abdullah Zeydan têkildarî îdiayan li ser hesabên xwe yê Xê daxuyanî dan û bertekên tund nîşanî pêkanînan dan û diyar kirin ku tayînkirina qeyûman ne tenê destwerdanek siyasî ye, di heman demê de mafên xebatkaran jî dike hedefa xwe.
‘Derbarê kesên li dijî biryarê derdikevin jî girtek tên girtin’
Hevşaredaran diyar kir ku wan weke rêveberiya Partiya Wekhevî û Demokrasiyê ya Gelan (DEM Partî) hewl dane şaredariyan bi şêwazekî rêveberiyê ku zêdetir wekhevîxwaz, piralî, rêz li maf û qanûnên her kesî digire birêve bibin û gotin: “Di vî warî de yek ji mijarên me sererastkirina şert û mercên xebatê yên şaredariya Wanê bû. Em hewl didin bêyî ku ferq û cudahiya ramanan hebe karmend di asta herî berhemdar de bixebitin. Me agahî girt ku xebatkarên jin ji bo karên weke paqijkirina tuwaletê tên erkdarkirin. Derbarê kesên ku li dijî vê yekê derdikevin de jî girtek tên girtin û ev yek nayê qebûlkirin.”
‘Em ê li dijî her cure bêhiqûqiyê rawestin’
Hevşaredaran destnîşan kir ku rêveberiya qeyûm polîtîkayên ku aramiya kar a li şaredariyê xera dike bi rê ve dibe û diyar kirin ku xebatkarên şaredariyê bi erkên kêfî û mobîngê re rû bi rû dimînin. Hevşaredaran diyar kirin ku rêveberiya qeyûm ne tenê çavkaniyên şaredariyê, mafên xebatkaran jî desteser kiriye û destnîşan kirin ku ew ê li dijî van pêkanînan bêdeng nemînin. Hevşaredaran da zanîn ku ew ê heta dawiyê mafên xebatkarên şaredariyê biparêzin û ev tişt gotin: “Polîtîkayên qeyûman tirsandin û fetisandina xebatkaran armanc dikin. Şaredariyê, ji vîna gel vediqetînin û kedkaran dixe ber pêkanînên keyfî. Lê belê em ê li dijî vê bêhiqûqiyê bisekinin. Weke ku me berê jî diyar kiribû, em bûyerên li şaredariyê diqewimin ji nêz ve dişopînin û careke din diyar dikin ku em ê bi hemû hêza xwe li dijî her cure bêhiqûqî rawestin. Nebin alîgirê van zextên dijhiqûqî yên li ser xebatkaran.”
