Amed – Yek ji navendên ku Newroz lê hate pîrozkirin jî navçeya Bismilê bû. Gelê ku tev li Newrozê bû bi dirûşma “Bijî Serok Apo” daxwaza azadiya Rêberê Gelê Kurd Abdullah Ocalan kir. Ciwanan bi zêdebûn û coşa xwe mohra xwe li Newrozê xist. Ciwanan bi dirûşma “Bijî Serok Apo” agir geş kirin.
Newroza îsal bi dirûşma “Rêbertiya Azad, Civaka Demokratîk” tê pîrozkirin. Yek ji navenda ku îro Newroz lê hate pîrozkirin jî navçeya Bismilê ya Amedê bû. Parlamenterê Partiya Wekhevî û Demokrasiyê ya Gelan (DEM Partî) Serhat Eren, Hevşaredarên Bismilê Mizgîn Ekîn û Guven Tanrikûlû, rêxistinên DEM Partî û DBPê yên navend û navçeyê, nûnerên saziyên sivîl ên civakî û gelek welatî tev li bernameyê Newrozê ku li qada kêleka Otogarê hate pîrozkirin bûn. Qad bi alên DEM Partiyê yên bi kesk û sor û zer û şîn û spî hate xemilandin.
Di ketina qadê de çend noxteyên kontrolê yên polîsan hebûn. Piştî ku welatî di van noxteyan de derbas bûn bi coş û keyfxweşî herikîn qadê. Tevî germa hewayê û rojiya remezanê jî bi hezaran kes li qada Newrozê kom bûn. Balkêş bû ku hejmara jinan û ciwanan a li qada Newrozê zêde bû. Jin û ciwan bi cil û bergên xwe yên kurdî beşdarî Newrozê bûn. Ji destpêka bernameyê heta dawiyê coşa ciwanan berdewam kir.
Him welatiyan û hem jî li zarokên cil û bergên Kurdî li xwe kirin û herikîn qadê. Dîsa gelek dayik bi laçik û benên kesk û sor û zer tev li bernameya Newrozê bûn. Di tevahiya bernameya Newrozê de welatiyan li çepikan dan, dirûşma “Bijî Serok Apo” berz kirin û lîlandin. Beşdarvanan hem li ber dahol û zirneyê hem jî li ber stranên ku ji ser dikê dihatin lêxistin govend gerandin. Dema agirê Newrozê hate vêxistin welatiyan, bi taybetî ciwanan dirûşmên “Bijî Serok Apo” û “Jin jiyan azadî” berzkirin. Her wiha hin welatiyan cilên xwe avêtin nava agirê Newrozê û agir gurtir kirin.
Dû re li dora agirê Newrozê govend hate gerandin. Pişt re welatiyan li ber stranên ku Koma Dilzar û hunermend Azad Bedran gotin govend gerandin û dîmenên rengîn derketin holê. Her wiha welatiyan strana bi navê “Zindan” ku Azad Bedran got bi wî re gotin.
Hin dayikên ku me têkildarî banga Rêberê Gelê Kurd û Newrozê mikrofon dirêjî wan kir, hestiyar bûn û gotin hêvî dikin ku ev Newroz bibe wesîleya azadiya Rêberê Gelê Kurd Abdullah Ocalan û zarokên wan ên girtî.
Her wiha hin dayikan Newroza zarokên xwe yên şervan jî pîroz kirin û gotin daxwaza wan ew e ku ev pêvajoya heyî bi aştiyeke mayînde bi encam bibe.
Dema mirov coşa welatiyan û dirûşmên berzkirin li ber çavan digire, dibîne ku xwedî li banga Rêberê Gelê Kurd Abdullah Ocalan derdikeve û dixwazin êdî wî di nava xwe de bibînin.
Her wiha temamê axivêran bal kişandin ser banga Rêberê Gelê Kurd Abdullah Ocalan û girîngiya wê û xwestin xwedî li banga wî bê derketin.
