Li bajarên Laziqiye, Tertûs, Ceblê, Humis û Hema yên Sûriyeyê gelek komkujî pêk tên. Hat zanîn ku di şerê navbera çekdaran de 147 kes mirin e.
Li gorî nûçeya Ajansa Nûçeyan a Hawarê (ANHA); Hejmara kuştiyên pevçûn û şerê dijwar ên li bajarên Laziqiye, Tertûs, Ceblê, Humis û Hemayê yên Sûriyeyê zêde dibe. Ji şevê din ve di navbera komên çekdar û hêzên girêdayî desthilata Şamê ango HTŞê de şer û pevçûnên dijwar didomin.
Ligel van rageşiyan, her du alî hev tawanbar dikin ku komkujî li dijî welatiyan pêk anîne.
Desthilata Şamê diyar dike ku ew bi ser bermahiyên rejîma berê de digire û komên çekdar jî dibêje tevgera wan li dijî desthilata heyî û parastina herêmên xwe ye.
Li gorî raporên xwecihî, heta niha hejmara miriyan ji 147 kesî bihûrî ye. Gelek mal hatine şewitandin û zirar dîtine.
Li ser dezgehên çapemeniyê wêne û dîmenên tên belavkirin, mezinahiya wêranî û komkujiyan diyar dike. Her wiha di dîmenên ji herêman tên parvekirin de bi dehan cenaze li kolan û eraziyan hatine belavkirin.
Heta niha jî tu daxuyaniyek fermî ji her du aliyan ve der barê bîlançoya kuştiyan an jî hûrgiliyên êrişên leşkerî yên niha, digel hevtawanbarkirina li ser komkujiyan, nehatiye dayîn.
Digel nebûna tu însiyatîfeke agirbestê şer û pevçûn didomin. Ew jî nîşan dide ku karesateke mirovî li van herêman çêbibe û her ku biçe tundî zêde bibe.
SOHR: Gelek kes winda û dîlgirtî ne
Li gorî Navenda Çavdêriya Mafên Mirovan a Sûriyeyê (SOHR) ji kuştiyan; 37 endamên wezareta parastinê û hundirîn in û 34 jî ji artêşa rejîma berê ne û 7 jî sivîl in. Her wiha bi dehan kes jî birîndar bûn, winda û dîlgirtî ne.
