Li bajarê Abdananê yê Rojhilatê Kurdistanê nerazîbûnên gel ên piştî mirina 13 karkeran didomin. Di çalakiyên şermezarkirinan de 6 kes hatin binçavkirin.
Li bajarê Abdananê yê girêdayê Îlamê yê Rojhilatê Kurdistanê di 14ê mijadarê de wesayîta xebatkarên şîrketa NGL ya Dêhloranê (Dêhlûr) qeza kir û di encama qezayê de 13 karkeran jiyana xwe ji dest da, 17 karker jî birîndar bibûn. Piştî qezayê, roja 15ê mijdarê dikandarên bajêr dikanên xwe girtin û roja 17ê mijdarê jî bi sedan welatî daketin kolanan.
Xwepêşandan gihişt bi hezaran kesan
Çalakiya ku li Meydana Velîasr bi 200-300 kesan dest pê kir, di demeke kurt de gihîşt nêzî hezar kesî. Xwepêşanderan rewşa giran a debarê, bihabûn, xerabiya rêyan, kêmbûna binesaziyê û xemsariya rayedaran şermezar kirin û dirûşmên wekî “Îro rojên şînê ye”, “Berpirsê bêbext îstifa” û “Xizanî, gendelî, bihabûn; em heta hilweşandinê dimeşin” berz kirin.
Înternet li bajêr hatiye qûtkirin
Hêzên taybet û ewlehiyê mudaxeleyî xwepêşandanên ku heta êvarê li kolanên bajêr berdewam kirin, kir. Li gorî çavkaniyên herêmî, li bajêr înternet hat qutkirin û li dijî xwepêşanderan gaza îsotê û çek hatine bikaranîn.
Li gorî agahiyên Ajansa Rojmanê nasnameyên kesên di xwepêşandanan de hatine binçavkirin ew in: “Îrec Heyderî, Seîd Ebdullahî, Behnam Muradî , zarokê 15 salî Sîna Derwîşî, Exser Ekberî û Armîn Silêman.”












