Wan – Li Wanê peyarêyên ku gelek teng in û wesayît li ser tên parqkirin, bûye pirsgirêkek mezin. Welatî dixwazin tavilê çareseriyek bê peydakirin.
Piştî mezinbûna bajaran, gelek pirsgirêkên bajarvaniyê derketin holê ku yek ji van peyarê ne. Li Wanê ji ber nebûna trafîkeke bi rêk û pêk, peya nikarin peyarêyan bi kar bînin û li ser wan bimeşin. An peyarê gelek teng in an jî wesayît li ser hatine parkkirin. Taybet li sûka Wanê peya gelek astengiyan dijîn û nikarin bi rihetî tevbigerin. Her wiha ev yek ji bo welatiyên astengdar jî pirsgirêkek gelek mezin e ku ew jî nikarin li bajêr bi rihetî bigerin û kar û barên xwe bimeşînin.
Desteserkirina peyarêyan
Peyarê ji bo parqkirina erebeyan nehatine çekirin, lewma parqkirina erebeyan li ser peyarêyan qedexe ye. Ji bilî vê jî li ser peyarêyan tiştên peyayan esteng dikin divê neyên danîn. Desteserkirina peyarêyan zêdetir ji bo kal û pîr, astengdar, zarok, û dayikên di destê wan de erebeyên zarokan hene, dibe pisgirêk. Ev rewş jiyana peyayan jî dixe di bin xetereyê de. Li Wanê jî ev rewş gelek berbiçav e. Li navenda bajêr peyarê ji aliyê dikandaran ve hatine desteserkirin. Meşa di nav bajêr de jî bi vî awayî zehmet dibe. Peyarêyên Wanê ne tene ji aliyê dikandaran ve tên desteserkirin, wesayît jî li ser peyarêyan tên parqkirin. Her wiha pedîviyên astengdaran jî gelemperî berbiçav nehatine girtin.
Welatiyên Wanê, derbarê zehmetiyên çûn û hatê yên li ser peyarêyan ji ajansa me re axivîn.
‘Rê teng in û erebe zêf in’
Emrullah Yalçin bal kişand ser tengbûna rêyan û zefbûna wesayîtan di nav bajêr de û wiha axivî: “Kolan teng in û dema ji her du milan jî erebe tên parqkirin, tengtir dibin. Ne tenê li navenda bajêr, derdora wê û taxan de jî trafîkek tevlihev heye. Divê berpisyar çareseriya vê yeke bibinin.”
‘Divê gel jî berpisyariyên xwe bizanibe’
Zabît Haykir anî ziman ku li ser peyarêyan wesayît tên paqkirin û ev tişt got: “Ew pisgirêk ne ya gel e, ev pisgirêka şaredariyan e. Li ser rêya me rampayek heye û belkî rojê 20 kes vê derê dikeve. Herî zêde jî zivistanan dayikên me pir zehmetiyan dikşînin. Helbet tenê divê ne şaredarî, divê gel jî berpisyariyên xwe bizane. Di peyareyan de erebe tên paqkirin. Di taxên me de bihêle peyarêyan rêyên normal jî nîn in.”
Dê û bav nikarin bi erebeya zarok bimeşin
Ceylan Îkne û Aydin Îkne ên di destê wan de erebeya zaroka wan hebûye, diyar kirin ku ew ji ber tengbûn û astengiyên li ser peyarêyan bi rihetî nikarin bi erebeya zarokan ve bimeşin. Ceylan Îkne nerazîbûna xwe nîşanî berpirsan da û xwest çareserî bên dîtin.
