Li Baxçeyên Hewselê ku yek ji nirxên girîng ên xwezayî û çandî yên Kurdistanê ye, di van rojên payîzê de marol û kelemên ku bûne mîna sembola Baxçeyê Hewselê, bi dîtbariyek bedew radixe ber çavên mirovan. Wênegir Mehmet Masum Suer wêneyên vê kêliya dîdariya demsalê girtin e.
Li Baxçeyên Hewselê gelek cureyên sebze û fêkiyan têne çandin. Marol û kelemên ku bi awayekî sîmetrîk hatine çandin dîtbariyeke ango dîdariyeke taybet derdixin holê. Ev wêneyên ku ji aliye wênegir Mehmet Masum Suer ve hatine girtin, xweşikiya Baxçeyên Hewselê bi awayekî hunerî nîşanî mirov dide. Ev wêneyên ku piştî barana ewil a demsala payîzê hatine girtin, bi derketina rojê, ewran û sûrên dîrokî yên Amedê re dibin yek û dîtbariyeke mîna tabloyên hunerî radixe ber çavan.
Dîroka Baxçeyên Hewselê
Baxçeyên Hewselê û sûrên Amedê di sala 2015an de ji aliyê UNESCOyê ve bi armanca baştir bê parastin tev li Lîsteya Mîrateya Çandî ya Cîhanê hate kirin. Dîroka Baxçeyên Hewselê digihêje beriya 8 hezar salan û ji wê çaxê ve heta niha bênavber çandinî lê tê kirin. Baxçeyên Hewselê ji nêzîkî 700 hektar erdê bi berhem ê di navbera Çemê Dîcle û sûrên Amedê de pêk tê.
