Endama Koordînasyona KJKê Besê Erzîncan diyar kir ku heqîqeta civak, jiyan û azadiyê rasterast bi femkirina heqîqeta jinê ve girêdayî ye. Erzîncan anî ziman ku felsefeya Jin Jiyan Azadî formuleke gerdûnî ya rizgarî û avakirina jiyana nû ye û wiha got: “Têgeha xwebûnê bingeha xeta azadiya jinê ye. Şoreşek ku jin tê de neyê azadkirin, nikare civakê azad bike. Jiyana komînal û avakirina civaka demokratîk bêyî vîn û tevlîbûna jinê nayê fikirîn. Têkoşîna navxweyî û paqijbûna ji bandorên pergala serdest ji bo her alîgirê azadiyê pêdiviyeke teqez e.”
Endama Koordînasyona KJKê Besê Erzîncan di hejmara 8emîn a Kovara Ozgur Halkê de bi gotara xwe ya bi sernavê “Jin Jiyan Azadî: Heta Heqîqeta Jinê Nayê Famkirin Heqîqeta Civakê Nayê Famkirin” felsefeya xwebûnê, guherîna kesayet û rola pêşengiyê ya jinê di nav têkoşîna azadiyê de bi kûranî dinirxîne. Erzîncan di nivîsa xwe de destnîşan dike ku heqîqeta civak, jiyan û azadiyê rasterast bi femkirina heqîqeta jinê ve girêdayî ye.
‘Têgeha xwebûnê bingeha xeta azadiya jinê ye’
Besê Erzîncan di destpêka gotara xwe de balê dikişîne ser girîngiya naskirina xwebûnê û destnîşan dike ku avakirina ferd û civaka azad tenê bi zihniyeta xwebûnê pêkan e. Besê Erzîncan anî ziman ku xwebûn berî her tiştî rizgariya ji hişmendiya serdest a mêr û pergalên paşverû ye. Besê Erzîncan wiha dinivîse: “Ji bo ku jin azadiya xwe ya rastîn ava bike, pêwîst e berê xwe bide cewher û dîroka xwe û ji nû ve xwe şirove bike. Li gorî gotarê, xwebûn ne tenê sekneke ferdî ye, di heman demê de xwedîderketina li nirxên exlaqî û politîk ên civakê ye.”
‘Şoreşa Kurdistanê di cewherê xwe de şoreşa jinê ye’
Têkildarî mijarê Besê Erzîncan anî ziman ku ji bo serkeftina têkoşîna azadiya Kurdistanê, pêşengiya jinê û xeta azadiya jinê merceke bingehîn e. Erzincan dinivîse ku şoreşek ku jin tê de neyê azadkirin, nikare civakê azad bike û tu carî nabe şoreşeke civakî ya rastîn. Besê Erzîncan van nirxandinan dike: “Şoreşa Kurdistanê ji roja yekem ve li ser esasê azadiya jinê bi pêş ketiye û îro jî ev pîvan girîngiya xwe diparêze. Pêşxistina şoreşê û garantîkirina paşerojeke demokratîk tenê bi pêşengiya birdozî û rêxistinî ya jinê gengaz dibe.”
‘Avakirina kesayetiya şoreşger ked û fedakariyê dixwaze’
Di gotarê de Besê Erzîncan rexneyên girîng li ser formên kesayetê yên kevneşop û kapîtalîst dike û girîngiya avakirina kesayetiya nû ya şoreşger ronî dike. Di nivîsê de tê diyarkirin ku guherîna zihniyete û nûjenkirina kesayetê ne proseye ke hêsan e; kedeke domdar, rexne û xwerexnekirinê dixwaze. Di nivîsê de ev nirxandin cih digirin: “Kesayetiya ku li dijî paşverûtiyê û zayendperestiyê têkoşînê nede, nikare bibe pêşengê pêvajoyên azadiyê. Ji ber vê yekê, rojane têkoşîna navxweyî û paqijbûna ji bandorên pergala serdest ji bo her alîgirê azadiyê pêdiviyeke teqez e.”
‘Diruşma Jin Jiyan Azadî felsefeyeke cîhanî ye’
Yek ji mijarên sereke yên ku di gotarê de li ser tê rawestandin, belavbûn û kûraniya felsefeya “Jin Jiyan Azadî” ye. Besê Erzîncan diyar dike ku ev diruşm tenê peyvek an jixweberiyek nîne, formuleke gerdûnî ya rizgarî û avakirina jiyana nû ye û wiha didomîne: “Felsefeya ku di nav vê diruşmê de neşir dibe, îro sînorên herêmê derbas kirine û bûye çavkaniya îlhamê ji bo hemû tevgerên azadîxwaz ên cîhanê. Girêdana rastîn a di navbera jin, jiyan û azadiyê de tîpolojiya herî rast a jiyana hevgirtî û demokratîk nîşanî mirovahiyê dide.”
‘Rola azadiya jinê di nav jiyana komînal de sereke ye’
Besê Erzîncan destnîşan dike ku jiyana komînal û avakirina civaka demokratîk bêyî vîn û tevlîbûna jinê nayê fikirîn. Gotar wiha didome: “Di dabeşkirina xebatê, biryardarî û birêvebirina jiyana civakî de nirx û nêzîkatiyên jinê garantiya pîvanên demokratîk in. Tevlîbûna jinê ya di hemû qadên komûnal de rê li ber hişmendiya burokratîk û serdest digire û rihê hevgirtinê xurt dike. Pratîzekirina avakirina komînal tenê bi hişmendiyeke ku azadiya jinê dixe navenda xwe dikare bi ser bikeve. ”
‘Tekûziya biryardariyê û garantiya pêşeroja azad’
Di dawiya nivîsê de Besê Erzîncan bal dikişîne ser biryardariya di xeta azadiyê de û sekna beramberî astengiyan. Besê Erzincan diyar dike ku berxwedana li dijî hemû êriş û zextên pergalê tenê bi rêya birêxistinbûn û biryardariya îdeolojîk bi ser dikeve. Erzîncan nivîsa xwe bi bangawaziya xurtkirina têkoşînê, kûrkirina hişmendiya xwebûnê û berfirehkirina xebatên azadiya jinê di hemû qadên jiyanê de bi dawî dike.
