Nivîskar Erdal Engîzek di nivîsa ji Ozgur Halkê nivîsî de destnîşan dike ku ev pêvajoya ku bi gavên yekalî yên Abdullah Ocalan û Tevgera Azadiyê gihîştiye vê astê û pêvajo piştî qanûna çarçoveyê ya TBMMyê derbasî qonaxeke nû bûye. Engîzek diyar dike ku gelê Kurd û PKK bi ruhê 14ê Tîrmehê û berxwedana xwerû serdestiya teknîkî û êrîşên dewletê pûç kirine û dewlet li ser vî esasî neçar bûye ku pêvajoyê bide destpêkirin.
Nivîskar Erdal Engîzek di hejmara 8emîn a Kovara Ozgur Halkê de bi gotara xwe ya bi sernavê “Çiqas Hişmendiya Îdeolojîk Ewqas Pratîk” geşedanên siyasî yên dawî, rola berxwedana dîrokî ya PKKê û nexşerêya pêvajoya Aştî û Civaka Demokratîk dinirxîne. Erdal Engîzek balê dikişîne ser sedemên bingehîn ên ku dewleta Tirk anîne ast û xala peywendiyê. Engîzek diyar dike ku gelê Kurd û PKK bi ruhê 14ê Tîrmehê û berxwedana xwerû serdestiya teknîkî û êrîşên dewletê pûç kirine û wiha dinivîse: “Heke gerîlayên azadiyê serweriya teknîkî ya TSKê vala dernexistina û hevsengiya şer neafirandana, aqilê dewletê û Devlet Bahçelî tu carî gav nediavêtin û rûnediniştin ser maseyê.”
‘Siyaseta demokratîk rêxistinbûna komînan e’
Erdal Engîzek di dewama nirxandina xwe de rexneyên kûr li feraseta ku siyaseta demokratîk tenê di nav çarçoveya parlamenterîzmê de dibîne dike. Engîzek destnîşan dike ku divê ezberên berê bên hiştin û wiha dibêje: “Parlamenterîzm tenê dikare bibe amûrekî sembolîk di navbera civak û dewletê de. Esasê siyaset û jiyana nû, rêxistinbûna civakê ya ji jêr ber bi jor ve li ser bingeha komînan e. Lê belê divê komîn nebin mîna komîsyon û komîteyên berê yên bi tenê li ser kaxezê; divê li ser perspektîf û manîfestoya Rêber Apo ya îdeolojîk bên avakirin.”
‘Ji bo kadroyên serdemê pîvana bingehîn: Çendî hişmendî ewqas pratîk’
Erdal Engîzek balê dikişîne ser xisûsiyeta kadroyên vê pêvajoyê û diyar dike ku rêbazên berê êdî nikarin bersivê bidin pêdiviyên serdemê. Engîzek felsefeya Abdullah Ocalan a “Teorî û hişmendiya me ji bo kê be, pratîk jî ya wî ye” bi bîr dixe û radigihîne ku xeta pêşengtiyê ya vê serdemê kûrbûna di sosialîzma demokratîk û hevrêtiya komînalîst de dixwaze.
