Li Stenbolê bi ser gelek malan de hate girtin. Di serdegirtinên malan de endamên EMEP, SYKP, HDK, ESP, DBP, Partiya Çep a Kesk û 2 rojnameger jî di nav de herî kêm 52 kes hatin binçavkirin.
Serê şeveqê di çarçoveya lêpirsîna Serdozgeriya Komarê ya Stenbolê daye destpêkirin de polîsan bi ser gelek malan de girtin. Di serdegirtinên malan de endamên Kongreya Demokratîk a Gelan (HDK), Partiya Herêmên Demokratîk (DBP), Partiya Kedê (EMEP), Partiya Jinûveavakirina Sosyalîst (SYKP), Partiya Sosyalîst a Bindestan (ESP) û Partiya Çep a Kesk jî di nav de gelek kes hatin binçavkirin.
Serdozgeriya Komarê ya Stenbolê ragihand ku opersayon li dijî HDKê hatiye kirin û di çarçoveya lêpirsînê de li 10 bajaran ji bo 60 kesan biryara binçavkirinê hatiye dayin û heta niha 52 kes hatin binçavkirin.
Navên hin kesên hatine binçavkirin, ev in: Aynûr Cengîz, Melîh Kayhan Pala û Esengul Demîr ên endamên HDKê; Nacî Donmez ê ji Partiya Çep a Kesk; ji EMEPê Sema Barbaros, Mûstafa Mayda, Mehmet Turp; ji ESPê Semîha Şahîn; ji DBPê Atîlla Ozdogan, Erkîn Barin Goyluler; ji SYKPê Halît Elçî, Mehmet Saltoglû, Ahmet Saymadi; rojnameger Yildiz Tar, Ercument Akdenîz, Elîf Akgul û wênesaz Taner Guven û hunermend Pinar Aydinlar .
DEM Partî nerazîbûn nîşanî operasyonê da
DEM Partiyê têkildarî operasyona binçavkirinê li ser hesabên xwe yên medya dîjîtal daxuyanî da û nerazîbûn nîşan da. Daxuyaniya DEM Partiyê wiha ye: “Tirkiye îro bi operasyona li dijî HDK3e hişyar bû. Rêveberên navenda partiya me jî di nav de gelek pêkhateyên partiya me hatin binçavkirin. Wisa eşkere xuya dike ku îhtîmala aştî û çareseriyê zora hin kesan diçe. Her roj li dijî kesên aştiyê û çareseriyê dixwazin operasyon pêk tên. Her roj qeyûm tayînî îradeya gel dikin. Her roj êrişî tifaqa gelan û têkoşîna hevpar dikin. Li dijî civakê, îradeya gel û lêgerînên aştî û çareseriyê êriş pêk tên.
Lê belê em ji van operasyonên we natirsin. Helbet wê rojekê aştî were ser vê axê. Hûn çi dikin bikin, wê ev operasyonên we feyde li xelkê neke. Ev zîhniyeta li dijî îradeya gel û îradeya siyasî şer daye destpêkirin dê têk biçe.”
