Kongra Star bal kişand ser zêdebûna siyaseta îdamê ya rejîma Îranê û diyar kir ku desthilatdarî îdamê wekî amûrekî tirsandinê bi kar tîne, lê îradeya gelan bi darên îdamê nayê tunekirin.
Kongra Star têkildarî pêla darvekirinê ya li Îranê zêde bûye daxuyaniyeke nivîskî da. Di daxuyaniyê de hate bi bîr xistin ku li girtîgehên cuda yên Îranê gelek girtî hatine darvekirin û wiha hate gotin: “Li gorî daneyên rêxistinên mafên mirovan di navbera 24–26ê Tebaxê de li girtîgehên Xorramabad, Sari, Rasht, Yazd û Îsfahanê heft girtî hatine îdamkirin. Di nava van de îdama Arezou Rostad a 23 salî bi taybetî dilê me dişewitîne. Rostad di 19 saliya xwe de bi zorê hatibû zewicandin û piştî wê bi sûcdariya ku mêrê xwe kuştiye hatibû mehkûmkirin. Arezou ya ku di 24ê Tebaxê de hat îdamkirin, ji aliyê rayedaran ve ji raya giştî re nehatiye ragihandin. Em li ser navê Arezou û hemû jinên ku hatine îdamkirin, ji malbatên wan re sersaxiyê dixwazin û piştgiriya xwe ya bi berxwedana gelên Îranê re radigihînin.”
‘Darvekirin ne tirsê, hêrs û berxwedanê zêde dike’
Daxuyaniyê bi van tespîtan dewam kir: “Rejîma Îranê li şûna ku bersiva daxwaza azadiyê bide, îdamê wekî amûrekî tirsandin û bêdengkirinê bi kar tîne. Bi taybetî îdamkirina kesên ku bi protestoyên Çileya 2026an ve girêdayî ne, nîşan dide ku ev siyaset ji bo tepisandina muxalefeta civakî tê bikaranîn. Îdama Majid Adineh di 23’ê Tebaxê de ku bi van protestoyan ve girêdayî bû, nimûneya dawî ye. Îdam rejîmê xurt nîşan nade; berevajî vê, qutbuyina di navbera gel û desthilatê de hîn mezintir dike. Her ku zext zêde dibe, cihê tirsê hêrs û berxwedan digire.”
Banga hîstiyariyê: Bêdeng nemînin
Kongra Star bal kişand ser bêdengiya hêzên navneteweyî jî û ev bang kir: “Bêdengiya navneteweyî cesaretê dide rejîmê. Rêxistinên mafên mirovan û hêzên demokratîk divê li hemberî van îdamên li Îranê helwesteke bihêztir û encamgir bigirin. Lê tevî van zextan hemûyan, berxwedana jinan, ciwanan û kedkaran ne rawestiyaye.”
Rêzê ji îradeya jin û gelan re bigirin
Kongra Star di dawiya daxuyaniya xwe de destnîşan kir ku divê darvekirin tavilê werin rawestandin, rêz li îradeya azadiyê ya jin û gelan bê girtin û mafê jiyaneke demokratîk ji gelên Îranê re bê naskirin.
