Di şahiya ku ji aliyê Meclîsa Ciwanan a DEM Partiyê ya Îzmîrê ve hat lidarxistin de Hevşaredara Êlihê Gulistan Sonuk axivî û got: “Ji bo em karibin hemû daxwazên xwe bi cih bînin, biaxivin û ji bo azadiya gelê kurd bi desthilatdariyê an jî bi giştî bi dewletê re gavên nû biavêjin, divê em têkoşîna xwe hîn mezintir û xurtir bikin.”
Meclîsa Ciwanan a Partiya Wekhevî û Demokrasiyê ya Gelan (DEM Partî) ya Îzmîrê, bi şîara “Ji vejîna gavekê, ber bi azadiya hezar gavan ve” bi boneya salvegera pêngava 15’ê Tebaxê şahiyek gel lidarxist. Şahî li Kadifekale Sur Içî pêk hat û dirûşmên “Jin, jiyan, azadî”, “Bijî Serok Apo”, “Bê Serok jiyan nabe” hatin berzkirin. Dayikên Aştiyê, Tevgera Jinên Azad (TJA), rêxistinên bajêr û navçeyan ên DEM Partiyê, Hevşaredara Êlihê Gulistan Sönük û gelek welatî beşdarî şahiyê bûn.
‘Di 15’ê Tebaxê de li dijî înkarkirina kurdan gavek hat avêtin’
Şahî bi coşeke mezin bi govendê dest pê kir. Di şahiyê de yekem car Dayika Aştiyê Peyruze Kurt axivî. Peyruze Kurt diyar kir ku di 15’ê Tebaxa 1984’an de li dijî înkarkirina hebûna kurdan û gelên bindest gavek hatiye avêtin û got: “Em ê heta dawiya jiyana xwe li ser rêya nemirên xwe bimeşin. Şehîdên me, rûmeta gelê me ne. Ji bo gelên bindest, li dijî zilmê bedelên mezin hatin dayîn. Roja vejîna hemû girtiyên me yên li zindanan, ya Birêz Ocalan û ya hemû gelên bindest pîroz be. Weke ku Rêberê me jî dibêje, ‘Me bi ciwanî dest pê kir, em ê bi ciwanî bi ser bikevin’.”
‘Ev pêvajo bi Rêber Abdullah Ocalan re wê bi azadiya gelê kurd tacîdar bibe’
Pişt re Hevşaredara Êlihê Gulistan Sonuk axivî. Sonuk anî ziman ku ew di pêvajoyeke dîrokî de ne hem ji bo gelê kurd û hem jî ji bo gelên Tirkiyeyê û wiha got: “Bê guman ev pêvajo bi hewl û pêşengiya Rêber Abdullah Ocalan dest pê kiriye û wê bi hewlên wî dewam bike. Gelê kurd û hemû beşên civakê, gelê Rojhilata Navîn jî bawer dike ku ev pêvajo bi Rêber Abdullah Ocalan re wê bi azadiya gelê kurd tacîdar bibe. Bê guman dema em îro vê pêvajoyê dinirxînin; di vê rêya ku hatiye vekirin û destpêkirin de, ked û keda zarokên gelê kurd, ked û keda hemû şervanên şoreşa Kurdistanê û keda gelê me yê bi salan li ber xwe dide, bingehê vê dozê ne û em deyndarê wan in. Em careke din di vê pîrozbahiyê de deyndariya xwe tînin ziman û dibêjin; heta em hebin em ê şopdarên vê fedakariyê bin, em ê şopdarên keda şervanên xwe bin. Ev meseleya ku îro li Tirkiyeyê deng vedaye, dîsa bi hewldana gelê kurd û hemû beşên ku di dîrokê de cihê xwe li kêleka aştiyê girtine, bi qanûnên di parlementoyê de pêk hatiye.
‘Em ê têkoşîna xwe li ser xeta Abdullah Ocalan bimeşînin’
Gulistan Sonuk bal kişand ser kêmasiyên qanûna çarçoveyê û wiha domand: “Tevî vê yekê jî ev qanûn girîng in û bi têkoşîneke xurtir, bi perspektîveke berfirehtir ev qanûn derî li çareseriya demokratîk û azadiya gelê kurd vedike. Bê guman em nafikirin ku bi derketina van qanûnan re her tişt qediya ye. Berevajî, weke gelê kurd ev pêvajoyeke ku zehmetiyên wê dihatin jiyîn bû, ji ber vê yekê ji bo em karibin hemû daxwazên xwe bi cih bînin, biaxivin û ji bo azadiya gelê kurd bi desthilatdariyê an jî bi giştî bi dewletê re gavên nû biavêjin, divê em têkoşîna xwe hîn mezintir û xurtir bikin. Rêbertiyê navê vê pêvajoyê danî: Pêvajoya aştiyê û civaka demokratîk. Bê guman aştî bi hêsanî çênabe, mirov bi hezar û yek zehmetiyan, bedelan û pevçûnan re rû bi rû dimîne, lê avakirina civakeke demokratîk vê yekê hewce dike. Em jî dê her dem têkoşîna xwe li ser xeta Rêber Abdullah Ocalan bimeşînin. Lê weke gelê kurd em ê di her qada ku em lê dijîn, di her bajêr, her kolan û her malê de bibin xizmetkarê vê pêvajoyê, bibin xizmetkarê civaka demokratîk. Ger em dixwazin civakeke azad û demokratîk ava bikin, li ku derê kêmasiyek hebe, em ê çareseriyê û avakirinê ji nû ve bidin destpêkirin. Ji ber vê yekê em 24 saetên xwe pêşkêşî vê pêvajoyê dikin; çimkî kesî nirxê ziman, têkoşîn û azadiyê bi tepsiyeke zêrîn pêşkêşî me nekir.”
‘Tu destkeftî bi hêsanî nehatine bidestxistin’
Gulistan Sonuk diyar kir ku tu gel bêyî têkoşînê nikare azadiya xwe bi dest bixe û got: “Weke gelê kurd em şahidê dîroka nêz in û di dîrokê de dibînin ku tu destkeftî bi hêsanî nehatine bidestxistin. Lewma zehmet e, lê nêzîk e; nexasim du sal berê kesî xeyal nedikir ku li rojavayê Tirkiyeyê ev gav werin avêtin. Çima? Çimkî perspektîfa azadiya kurd û Kurdistanê li vê erdnîgariyê ne perspektîfek nû ye, ne perspektîfek e ku îro derketiye holê; ev perspektîf sed sal berê bi damezrandina komarê re bi înkarkirina kurdan, bi awayekî hiqûqî derxistina derve û di bin zextê de girtina kurdbûnê re dest pê kir. Lê di vê qonaxa ku em îro hatine de, em behsa keda gelê kurd, fedakariya gelê kurd û pêşengiya Rêber Ocalan dikin.”
Piştî axaftinan Koma Gulbay û hunermend Hogir Mîran derketin ser dikê. Ciwanên ku bi stranan govend gerandin, posterên Rêberê Gelê Kurd Abdullah Ocalan vekirin. Polîsan hewl dan vekirina posterên Rêberê Gelê Kurd Abdullah Ocalan asteng bikin. Tevî astengiyan jî ciwanan bi coşeke mezin li govenda xwe dewam kirin.
Şahî bi dirûşmên “Bijî Serok Apo” bi dawî bû.
