Rûsya û Ûkraynayê ragihandin ku wan bi sedan dronên hevdû xistine. Di êrîşên li ser Ûkraynayê de 4 kesan jiyana xwe ji dest dan.
Wezareta Parastinê ya Rûsyayê ragihand ku navbera şeva pêncşemê û sihara înî de 553 balafirên bêmirov ên Ûkraynayê li Rûsya, Kirim, Behra Reş û Behra Azakê îmha kirine yan jî asteng kirine.
Hêzên Hewayî yên Ûkraynayê jî diyar kir ku heman şevê Rûsyayê 112 balafirên bêmirov şandine, ji van 90 balafir bi sîstemên parastina hewayî hatine bêbandorkirin. Li gorî rayedarên Ûkraynayê di dema êrîşan de li herêmên cuda cuda ji ber balafirên bêmirov zirar çêbûne.
Li herêma Sumy a li bakurêrojhilatê Ûkraynayê ji ber êrîşên balafirên bêmirov ên Rûsyayê jineke 29 salî û kurê wê yê 9 salî jiyana xwe ji dest dan. Ji ber êrîşên 24 saetên dawî yên li herêmê, jineke 63 salî jî jiyana xwe ji dest da û 5 kes birîndar bûn.
Li bajarê Kramatorsk ê li herêma Donetsk jî ji ber êrîşên Rûsyayê, herî kêm kesek mir û 15 kes birîndar bûn.
Pevguhertina cenazeyan
Li aliyê din Rûsya û Ûkraynayê ji bo cenazeyên leşkerên xwe yên di şer de jiyana xwe ji dest dane, pevguhertineke nû pêk anîn. Ûkraynayê ragihand ku 261 cenazeyên ji aliyê Rûsyayê ve hatine radestkirin, gihiştine Ûkraynayê.
