Meclisa Ciwanan a DEM Partiyê ya Rihayê bertek nîşanî zext û hewldanên sîxurtiyê yên li ser ciwanan da û diyar kir ku ev kiryarên şerê taybet rasterast pêvajoya aştiyê dikin hedef. Ciwanan bang kir ku ev polîtîkayên şerê taybet bi dawî bibin û gotin: “Em ê li her kolanê têkoşîna xwe mezin bikin.”
Meclisa Ciwanan a DEM Partiyê ya Rihayê li ser zext, gef, şopandinên li ser ciwanan û komên alîgirên Amedsporê yên Barikat Riha û Direniş Riha li Parqa Novada ya li navçeya Xelîliyê ya Rihayê daxuyanî da.
Daxuyanî ji aliyê endamê Meclîsa Ciwanan a Rihayê Siyament Şahîn ve hat xwendin. Şahîn destnîşan kir ku di demên daw de sezt û ferzkirina sîxurtiyê ya li ser ciwanan zêde bûye û got: “Zextên li ser ciwanan, rasterast mudaxaleya li ser lêgerîna aştî û civaka demokratîk e. Di demên dawî de xebatkarên Meclisa Ciwanan a DEM Partiyê û alîgirên Amedsporê yên komên Barikat Riha û Direniş Riha tên şopandin, rêya wan tê birîn, hewldanên siwarkirina wesayîtan, pêşniyarên pere û sîxurtiyê li wan tê kirin. Ev ne bûyerên asayî an jî munferît in.”
‘Ji aliyê saziyên mafên mirovan ve hatibû tespîtkirin’
Siyament Şahîn diyar kir ku ji aliyê kesên nenas ve gef li malbat û jiyana taybet a ciwanan tê xwarin û wiha domand: “Gotinên weke ’em dikarin alîkariya te bikin’, ‘bi van re negere’, ‘malbata te fermanber e dikare zirarê bibîne’ tên bikaranîn. Ev yek ne alîkarî ye, zext e; ne parastin e, gef e. Rêhevala me ya jin berê ev binpêkirin biribû OHD û ÎHDê, lê dîsa jî em dibînin ku ev kiryar zêdetir bûne.”
‘Em ê li her kolanê têkoşîna xwe mezin bikin’
Şahîn bang li rayedar û mercên berpirsiyar kir ku van bûyeran bi rengekî serbixwe lêkolîn bikin, berpirsiyaran tespît bikin û wiha bi dawî kir: “Em wekî ciwan stûyê xwe li ber van zextan xwar nekin. Berevajî vê, li her gund, tax û kolanên ku ciwan lê hene û rastî şerê taybet tên, em ê têkoşîna xwe mezin bikin. Rêya aştiyê ne ji gefxwarin û tirsandina ciwanan, ji berfirehkirina qada siyasetê û gavên demokratîk re derbas dibe.”
Daxuyanî bi dirûşma “Bijî berxwedana ciwanan” bi dawî bû.
