Dadgeha Cezayê Giran a Amedê 3 sal û 9 meh cezayê hepsê li Hevşaredarê Bajarê Mezin ê Wanê Abdullah Zeydan, birî.
Danişîna 8emîn a doza Hevşaredarê Bajarê Mezin ê Wanê Abdullah Zeydan ku bi îdiaya “Alîkarî daye rêxistinê” tê darizandin, li 5emîn Dadgeha Cezayên Giran a Amedê hat lidarxistin. Abdullah Zeydan beşdarî danişînê nebû. Parêzerê dosyeyê Mahsunî Karaman xwe ji dosyayê vekişand û li ser vê yekê Mehmet Emîn Aktar weke parêzer beşdarî danişînê bû. Aktar daxwaza dema zêde kir.
Dozger xwest ku daxwaza demê were redkirin. Şandeya dadgehê jî daxwaza demê qebûl nekir. Dozger xwest ceza li Abdullah Zeydan bê birîn.
‘Ez dadgehê red dikim’
Danişîna dozê bi parastina parêzer Mehmet Emîn Aktar berdewam kir. Emîn Aktar bertek nîşanî şandeya dadgehê da ku ji bo “ewlehiyê” ji Midûriyeta Polîsan a Bajar re muzekkere nivîsandiye. Aktar wiha axivî: “Bêyî ku xwe li benda parastina min bigirin, we duh bi wê nivîsê biryara xwe diyar kiriye. Parastin, mafê min û miwekîlê min e. Ev hêmanek darizandina adilane ye. We bi nedayina demê re ev hêman binpê kir. Bi helwesta xwe ya îro re hûn darizandina adilane binpê dikin û bêalîtiya xwe binpê dikin. Lewma jî ez dadgehê red dikim.”
Emîn Aktar têkildarî redkirina daxwaza xwe jî got: “Heke demeke maqûl neyê dayin ev yek dê bibe binpêkirina mafê darizandina adilane û mafê parastinê.”
Dadgehê bi îdiaya “Bi zanebûn û bi dilxwazî alîkarî daye rêxistinê” 3 sal û 9 meh cezayê hepsê li Abdullah Zeydan birî.
