Di Kûpaya Cîhanê de rêzik û qaîde her tim zelal û teqez in. Heke lîstikvanek karta sor bibîne, di maça bê de nikare dakeve qadê. Lê belê gava ku dor digihêje Donald Trump, qaîdeyên herî hişk ên futbolê jî di çavekî de serûbin dibin.
Piştî ku Serokê Amerîkayê Donald Trump rasterast bi rêya telefonê destwerdan li Serokê FIFAyê Gianni Infantino kir, cezayê karta sor ê golkerê Amerîkî Folarin Balogun hat betalkirin. Ev gava paşdedavêtina radîkal a FIFAyê, di cîhana futbolê û medyaya dîjîtal de de bû sedema bertekên pir mezin û tinaziyan.
Di maça tûra 32an a Kûpaya Cîhanê de, Amerîkayê tîma Bosna Hersekê 2-0 têk biribû. Lê belê di dema maçê de, lîstikvanê Amerîkî Folarin Balogun ji ber destwerdana tund a li ser lingê Tarik Muharemovic, rasterast karta sor dîtibû. Bi vê biryarê re, Balogun ji bo maça girîng a tûra 16an a li dijî Belçîkayê cezadar bûbû.
Lê li pişt perdeyê hevkêşeyeke din dest pê kir. Trump bi telefonê pêwendî bi Serokê FIFAyê Infantino re deynand û piştî vê guftûgoyê, FIFAyê biryara xwe guhert û karta sor betal kir. Trump li ser hesabê xwe yê Truth Social kêfxweşiya xwe wiha anî ziman: “Spas ji bo FIFAyê ku tiştê rast kir û neheqiyeke mezin ji holê rakir”
Ji Belçîkayê berteka tund
Ev biryara skandal herî zêde li Belçîkayê hêrsbûneke mezin derxist. Partiya Sosyalîst a opozîsyonê li Belçîkayê daxuyaniyeke pir tund weşand û diyar kir ku rûmeta FIFAyê hatiye binpêkirin: ” Kûpayeke Cîhanê ya ku pere û bandora siyasî tê de biryarê dide, hemû pêbaweriya xwe winda dike. Ji bo dilê Trump xweş bikin tewandina qaîdeyan, di rêya serkeftinê de serîlêdana hîleyê ye. Ev ji bo FIFA, Kûpaya Cîhanê û Amerîkayê dîmenek pir xemgîn e. Divê qaîde di sporê û jiyanê de ji bo her kesî wekhev bin.”
‘Divê FIFA li rex edaletê bisekine’
Li Ewropayê jî dengên nerazîbûnê bilind bûn. Endamê Parlamentoya Ewropayê û Rêberê Partiya Navend Rast a Frankofon, Yvan Verougstraete, daxuyand ku vê biryarê baweriya bi edaletê daxistiye asta sifirê û got: “Dema Trump dikeve dewrê, karta sor ji nişka ve wekî ‘neheqî’ tê pênasekirin. Ev bi rastî nayê bawerkirin. Divê FIFA li rex edaletê bisekine, ne ku nîşan bide ku serî li ber zextên siyasî ditewîne.”
Xwestin Serokê FIFAyê Gianni Infantino îstîfa bike
Her wiha li seranserê cîhanê, gelek futbolzanên navdar, lîstikvan û rahêneran bertekên tund nîşanî vê biryara FIFAyê dan. Di serî de alîgirên futbolê, gelek derdor û pispor daxwaz dikin ku Serokê FIFAyê Gianni Infantino demildest ji wezîfeya xwe îstifa bike.
