Amed – Beşdar û delegeyên Konferansa Hiqûqnasên Kurd li ser statuya gelê Kurd û rola hiqûqê ya di nexşerêya aştiyê de axivîn û destnîşan kirin ku armanca wan ew e ‘Hiqûqa Kurdan’ bi awayekî kolektîf were naskirin.
Li Amedê Konferansa Hiqûqnasên Kurd a Demokratîk bi dirûşma ‘Ji bo Azadî, Statu û Aştiya Hiqûqa Demokratîk’ li Eywana Konferansê ya Çand Amedê ya Şaredariya Bajarê Mezin a Amedê hat li darxistin, du rojan dom kir. Konferans ji aliyê Komeleya Hiqûqnasên Ji Bo Azadiyê (OHD) ve hat birêvebirin. Di konferansê de serokên baroyên bajarên Bakurê Kurdistanê, rêveberên saziyên hiqûqê û mafên mirovan, gelek parêzer û her wiha rêveberên DEM Partiyê yên hiqûqnas amade bûn.
Gotarvanên konferansê hiqûqnas û parlamentera DEM Partiyê ya Şirnexê Newroz Ûysal Aslan, Hiqûqnas Veysî Eskî û Hiqûqnas Ûmût Yilmaz hûrguliyên konferansê ji ajansa me re nirxandin.
‘Em hewl didin qadeke hiqûqê ya demokratîk ava bikin’
Di nirxandinên destpêkê yên konferansê de, hiqûqnas û parlamentera DEM Partiyê ya Şirnexê Newroz Ûysal Aslan anî ziman ku ev konferans rasterast bi pêvajoya aştî û lêgerîna statuyê ya Kurdan ve girêdayî ye û pirsên ku bûne sedema kombûna hiqûqnasên Kurd wiha rêz kir: “Statuya Kurdan wê çi be? Wê gelê Kurd çawa xwe di nava dewletê û civakê de ava bike? Û wek hiqûqnasên Kurd, berpirsyariya me di vê rewşê de çi ye? Em çi pêşniyar dikin?”
Newroz Ûysal bal kişand ser girîngiya hiqûqê di nexşerêya aştiyê de û wiha got: “Ji ber ku îro di pêvajoyê de nîqaşên herî sereke li ser zagon û hiqûqê dimeşin,em hewl didin qadeke hiqûqê ya demokratîk ava bikin.”
‘Em ê rêya muzekareyan xweş bikin’
Hiqûqnas Veysî Eskî jî di axaftina xwe de diyar kir ku ew dixwazin bi vê konferansê, her du alî wekhev bin û bikaribin bi rehetî daxwazên xwe bînin ziman û ev tişt anî ziman: “27ê Sibatê bangewaziyeke Birêz Ocalan çêbû da ku PKK xwe fesih bike û di vê çarçoveyê de li meclîsê komîsyonek hat avakirin û vê komîsyonê raporek pêşkêş kir. Piştî wê raporê eger qanûna çarçove derkeve û muzakere bi du aliyan bimeşe, lazim e her du alî jî li ser vê qanûnê fikrên xwe bînin ziman, em ê rêya vê xweş bikin. ”
Her wiha Veysî Eskî teqez kir ku pirsgirêka Kurd tenê bi yasayekê çareser nabe û armanca wan ew e ku ‘Hiqûqa Kurdan bi awayekî kolektîf were naskirin.’
‘Em dixwazin pêvoja aştiyê xurttir bibe’
Herî dawî Hiqûqnas Ûmût Yilmaz jî diyar kir ku ev 10 sal zêdetir e êrîş li ser hemû qadan heye û qada hiqûqê jî nesîbê xwe ji van êrîşan girtiye û destnîşan kir ku dixwazin di warê hiqûqê de tesîra êrîşan ji holê rabikin û ev tişt vegot: “Em dixwazin di aliyê hiqûqê de encamekê ji bo Kurdan û guhartina makezagonê derxin holê da ku pêvajoya aştî û civaka demokratîk xurtir bibe.”
