Amed – Bi boneya 33yemîn salvegera Komkujiya Madimakê hevserok û rêveberên partiyên siyasî, nûnerên saziyên sivîl meş li dar xistin û gotin: “Me komkujiya Madimakê ji bîr nekir, em ê nedin jibîrkirin.
Di 2ê Tîrmeha 1993an de 33 rewşenbîr û hunermendên tevlî Şahiyên Pîr Sûltan Abdal bûbûn li otela bi navê Madimakê hatin şewitandin û qetilkirin. Bi boneya 33yemîn salvegera Komkujiya Otela Madimakê bernameye bîranînê hat lidarxistin.
Li gel xizmên qurbaniyan, nûnerên rêxistinên Elewiyan, Hevseroka DEM Partiyê Tulay Hatîmogûllari, Hevseroka Giştî ya Partiya Herêman a Demokratîk (DBP) Çîgdem Kiliçgun Ûçar, Serokê Giştî yê CHPê yê hilbijartî Ozgur Ozel, nûnerên partiyên siyasî û rêxistinên civakî yên sivîl beşdarî bîranînê bûn.
Beşdarên bîranînê li ber Komeleya Çandê ya Pîr Sûltan Abdal li hev kom bûn. Piştre jî bi rengê kortejan ber bi Otela Madimakê ya berê ve meşiyan. Di meşê de pankartên bi nivîsa “Ronahiya Sêwasê wê ti carî venemire” û “33 sal derbas bûn me ji bîr nekir, em ê nedin jibîrkirin” hatin vekirin. Di meşê de gelek caran dirûşmên “Rizgarî bi tenê nabe, ya bi hev re ya jî ne yek ji me”, “Sêwasî ji bîr neke, nede jibîrkirin” û “Kujer wê hesab bide gel” hatin berzkirin. Malbatan afîşên bi nivîsa “Madimak Muzeya Şermê” daliqandin.
Di bîranînê de destpêkê xizma Seher Gulateş axivî kesên jiyana xwe ji dest dane bi bîr anî û got, “Komkujiya Madimakê sûcê li dijî mirovahiyê ye û em ti carî qebûl nakin ku dem di ser re derbas bibe. Ji ber ku dem di ser sûcê li dijî mirovahiyê re derbas nabe. Ev der wê bibe muzeya şermê.”
‘Divê hevrûbûn çêbe lêborîn were xwestin’
Hevseroka Giştî ya DEM Partiyê Tulay Hatîmogûllari jî bi bîr xist ku bi îdîaya ‘dem di ser re derbas bûye’ dosyaya dozê hatiye girtin û got, “Nepêkan e ku ev bê qebûlkirin. Ne tenê ji bo Komkujiya Sêwasê her wiha ji bo komkujiyên li Koçgirî, Dersim, Çorûm û Gaziyê jî canên Elewî li benda rûbirûbûneek heqîqî ne, li benda lêborîna fermî ne. Ev lêborîn divê bê xwestin.”
‘Di wijdana canên Elewî de muzeya şermê ye’
Tulay Hatîmogullari da zanîn ku xizmên 33 kesên hatine şewitandin divê dixwazin Madimak wek muzeya şermê were ragihandin û got: “Ji ber ku nehate xwestin ku rûbirûbûn bi vê heqîqetê re bê kirin. Ew bi xwe îro li vir in, li pişt me ne, bi pratîkî tabeleya xwe daliqandin. Ya ku divê bê kirn ew e ku ev yek bi rêyên fermî pêk bihata. Lê belê di wijdanê canên me yên Elewî de ev der muzeyeke şermê ye, hîn jî li benda lêborînekê ne.”
Ozgur Ozel piştre axivî û destnîşan kir ku Komkujiya Sêwasê divê wke sûcekî li dijî mirovahiyê bê qebûlkirin. Ozgur Ozel got, “Heta ku dewlet vê derê weke muzeyeke şermê qebûl bike û 2ê Tîrmehê jî weke roja şermê qanûnî bike, em ê têkoşîna xwe dewam bikin. 2ê Tîrmehê wê weke rojeke şermê bê bîranîn.”
Serokê Giştî yê EMEPê Seyît Aslan jî diyar kir ku yên li Madimakê mirov şewitandin ew mirov in ku AKP ava kirin û anî ziman ku AKP bi salan xwedî li kujeran derket.
