TEV-ÇAND’ê işaret bi dostaniya Kadîr Înanir a bi gelê Kurd re kir û got, “Di tevahiya jiyana xwe de xwedî sekneke humanîst, demokrat û aştiyane bû.”
Tevgera Çand û Hunerê ya Ewropayê (TEV-ÇAND) bi boneya koça dawî ya Kadîr Înanir peyamek nivîskî weşand.
TEV-ÇAND di peyama xwe de diyar kir ku Kadîr Înanir kesayetekî rewşenbîr, hunermend, sînemager û lîstikvanekî mezin bû û ev tişt gotin: “Em bi xemgîniyeke mezin bi koça wî ya dawî hesiyan. Jiyana xwe da sînemayê û di tevahiya jiyana xwe de xwedî sekneke humanîst, demokrat û aştiyane bû. Em Kadîr Înanir ne tenê weke hunermendekî mezin ê dostê gelê Kurd pênase dikin. Ew dostê gelan bû.”
‘Bê dudilî bi rola xwe rabû’
TEV-ÇAN bal kişand ser berpirsyariyên Kadîr Înanir girtine û derbarê mijarê wiha got: “Di pêvajoya çareseriyê ya salên navbera 2013-2015’an de ku hingî bê encam ma, cihê xwe di nava Komîsyona Mirovên Aqilmend de girt û ji bo çareseriya pirsgirêka Kurd û hemû pirsgirêkên civakî bêdudilî, bi rola xwe rabû.”
‘Xwest rola bavê gerîla ê hestiyan kurê xwe girtiye bilîze’
Dema ku me bihîst sînemagerê hêja Kadîr Înanir xwestiye di fîlmekî li ser teslîmkirina hestiyê gerîlayekî di nava kîsekî de bi rola bavê wî gerîlayî bilîze, em hem hestiyar bûn hem jî pê serbilind bûn. Ji vê helwesta wî me baştir fêhm kir ku Kadîr Înanir bi rastî jî bi êşên gel re bû û dixwest vê êşê, vê hesret û daxwazê bi hunera xwe nîşan bide. Eger firsend û merc hebûya, ji bo ev daxwaza wî ya dawî bi cih bihata me yê bi dil û can kar bikira. Ev daxwaza hevalê me yê hêja yê sînemager êdî weke wezîfeyekê li pêşiya me ye.
Me xwest beşdarî merasîma li Dika Mûhsîn Ertûgrûl a Harbiyeyê bibin. Ji ber koça dawî ya hevalekî xwe yê hêja yê hunermend ê bi vî rengî em gelekî diêşin. Bila serê malbat û hezkiriyên wî sax be. Weke dostekî hêja yê gelê Kurd kete hiş û dilê me. Qîmeta wî wê roj bi roj baştir bê fêhmkirin.”
