Hevserokê Giştî yê DEM Partiyê Tuncer Bakirhan li Amedê axivî û destnîşan kir ku ji bo aştiyê aliyê wan pirr zelal e û ew bang li desthilatdariyê dikin ku ji bo pêvajoyê gavan biavêje. Bakirhan dubare got ku ew li benda bangek dîrokî ya Abdullah Ocalan in û anî ziman ku rêya çareserî û aştiyê di Amedê û Enqereyê re derbas dibe.
Rêxistina DEM Partiyê ya Amedê û Rêxistina Partiya Herêmên Demokratîk (DBP) a Amedê di çarçoveya pêngava “Civînên Aştiya Civakî û Azadiyê” hatiye destpêkirin de li Navenda Kongre ya ÇandAmedê civîn li dar xistin. Hevserokê Giştî yê DEM Partiyê Tuncer Bakirhan, rêveber, parlamenter û hevşaredarên DEM Partiyê, rêveberên DBPê, aktîvîstên TJAyê, Dayikên Aştiyê, nûnerên rêxistinên sivîl ên demokratîk û bi sedan welatî tev li civînê bûn.
Tuncer Bakirhan û şandeya pê re li ber ÇandAmedê ji aliyê welatiyan ve hatin pêşwazîkirin. Civînê bi rêzgirtina ji bo cangoriyên têkoşîna azadî û demokrasiye dest pê kir. Piştre Hevserokê Giştî yê DEM Partiyê Tuncer Bakirhan têkildarî geşedanên di rojevê de axivî.
Tuncer Bakirhan bi xêrhatina hemû mêvanan kir û got: “Em hemû gelên xwe silav dikin. Dayikên Aştiyê hûn bi xêr hatine, bi serseran û serçavan hatine.”
Berxwedanî û çanda Amedê
Tuncer Bakirhan behsa berxedêrî û pirrengîniya Amedê kir û wiha got: “Amed bajarê berxwedanê, bajarê çand, ziman û baweriyan e. Amed her tim wek bere zindî li ser lingan e. Em îro li Amedê ne em ji bo Aştiya Civakî û Azadiyê bi gelê xwe re dicivin. Em li hemû bajaran û navçeyan van civînan li dar dixin.”
Berfirehiya axaftina Tuncer Bakirhan bi vî rengî ye:
“Birêz Ocalan di hevdîtinê de pirr tiştek muhîm dibêje, dibêje ‘Xwediyê vê meseleyê gelê me ye. A rast gel e û her tişt pê ve girêdayî ye. Bi gel re biaxivin û nîqaş bikin. Fikr, nêrîn û pêşniyarên gel ji min re bînin’. Em jî di serî de li bajarên Kurdistanê û hemû bajarên Tirkiyeyê em van civînan li dar dixin û em ê hewl bidin şande nêrîn û fikra gel ji birêz Ocalan re bibe.
Rêya çareseriyê di Amedê û Enqereyê re derbas dibe
Rêveberên vî welatî jî carna mîna me wate û girîngiyê didin Amedê. Carna dibêjin rêya aştiyê di Amedê re derbas dibe. Hin derdikevin dibêjin rêya Yekitiya Ewropayê di Amedê re derbas dibe. Em jî carek din dibêjin rêya çareserî û aştiyê di Amedê û Enqereyê re derbas dibe. Em Enqere jî deynin kêleka Amedê. Amed û Enqere navenda nîqaşên çareseriya demokratîk a pirsgirêka Kurd in. Yek ji pirsgirêka mezin a Tirkiyeyê pirsgirêka Kurd e. Em di pêvajoyek girîng a ku nîqaşên çareseriya pirsgirêka Kurd tên kirin de derbas dibin. Duh digotin Kurd tune ne lê îro rastiya gelê Kurd tê axaftin.,
Tirkiye nîqaşên pirr cidî diaxive. Em dixwazin ev nîqaş û pêvajo veguhere pêvajoya çareserî û aştiyek bi rûmet. Em jî xwedî li meseleya çareseriyê û aştiyê derdikevin. Em pêvajoyek girîng re rû bi rû ne. Em di serdemên herî zor de hatin cem we û em bi gelê xwe re axivîn. Heke gel tev li têkoşînê nebe, ew têkoşîn bi ser nakeve.
40 sal in tevî hemû zilm û zordariyê jî gelê me di têkoşîna xwe de bi israr e. Gelê me her tim têkoşîna xwe dewlemend kir. Gelo li cihekî din ê cîhanê têkoşînek wiha ya civakî û gel heye, ez nizanim.
Li Rojhilata Navîn sînor ji nû ve tên xêzkirin. Rojhilata Navîn adeta di nava aloziyê û krîzan û şeran de ye. Em jî neçar in vê rastiya Rojhilata Navîn bibînin û ji nêz ve nîqaş bikin.
Birêz Ocalan ku ev çar sal bûn dihat tecrîdkirin pê re hevdîtin pêk hatin. Em giringî û qîmetê didin van hevdîtinan.
Her kes berpirsiyar e
Heta îro dewletê û desthilatê gotin pirsgirêka Kurd tune û pirsgirêka ewlehiyê heye. Lê îro qonaxa em gihîştinê vaye ew jî vê rastiyê dibînin. Hemû kesên li Tirkiyeyê dijîn bûn mexdûrên vî şerî û êş kişandin. Lewma çareserî muhîm e. Divê tenê ne em Kurd divê hemû gelên Tirkiyeyê piştevaniya çareserkirina vê pirsgirêkê bike. Hemû kes ji çareserkirina vê pirsgirêkê berpirsiyar e.
Mafên gelê Kurd nas bikin
Heke ev pirsgirêk were çareserkirin divê Kurd bi mafên xwe bên nasîn. Divê zimanê wan bê nasîn û bibe zimanê perwerdehiyê. Divê qeyûm neyên tayînkirin. Divê dawî li feraseta yekeperestiyê û zilmê bê anîn.
Banga dîrokî ya Ocalan
Dibe ku bangek were kirin. Birêz Ocalan xwe ji bo bangek dîrokî amade dike. Birêz Ocalan wê têkildarî formula çareseriya demokratîk a pirsgirêka Kurd daxuyaniyek dîrokî bide.
Em dibêjin aştî ew radibin zilmê dikin
Em li aliyekî dibêjin ev pêvajoyek muhîm diqewime lê ew radibin qeyûm tayînî Şaredariya Sêrtê dikin. Ew radibin zilmê dikin.
Di heman demê de vê pêvajoya hevdîtinan helbet rojavayê Kurdistanê, Kobanê, Qamişlo jî eleqedar dike û dihewîne nava xwe. Em dibêjin aştî û çareserî lê ew her roj bombeyan bi ser Bendava Tişrînê ve dibarînin. Aliyekî bi me re civînan dikin lê em serê sibehê radibin ku qeyûm tayîn kirin e.
Em zîhniyeta qeyûm red dikin, qebûl nakin. Em ê serê xwe li ber qeyûmê wan û zilma wan netewînin. Helbet zilm hebe, lê li dijî vê jî berxwedan û têkoşîna me heye.
Em xwedî li peyamên Ocalan derdikevin
Em ê xwedî li peyamên birêz Ocalan û li vê pêvajoyê derkevin. Ji bo ev pêvajo veguhere pêvajoya aştiyê û çareseriyê em ê heta dawiyê têkoşîna xwe ya demokratîk berdewam bikin. Em ji aliyekî ve vê pêvajoyê ava dikin lê hinek radibin dixwazin vê pêvajoyê dabeş bikin û xera bikin.
26 sal in têkoşîna aştiyê dike
Heke em jî dixwazin ev pirsgirêk çareser bibe divê em bi hêz bin. Birez Ocalan ji bo aştiyek bi rûmet 26 sal in di zindanê de ye. Lê her tim dixwaze ev pisrgirêk şiklê aştiyane û demokrastîk were çareserkirin. Divê em jî destê birêz Ocalan bi hêz û xurt bikin. Divê em her tiştî li ser milê wî nehêlin. Divê em fikr û pêşniyarên wî bixin meriyetê û di vê çarçoveyê bi gel re parve bikin.
Tecrîdê rakin
Hemin hûn jî birêz Ocalan sermuzakerevan dibînin divê hûn tecrîdê rakin. Gelo di hucreyekê de ku birêz Ocalan tê îzolekirin wê çawa aştî were? Mirovekî di hucreyekê de ye, dibêjin fermo muzakere bike, ka ev li kî dera cîhanê hatiye dîtin.
Bihêlin bila birêz Ocalan bi gel re were ba hev
Heke Ocalan bi gel re were ba hev wê ev pêvajo hin bêtir li pêş bikeve. Bi tecrîd û îzolekirinê re pêvajoya muzakereyê nayê birêvebirin. Em ji vir bang li rayedaran dikin ku demildest dawî li tecrîdê bînin û bila birêz Ocalan bi civakê re were ba hev û gavek beriya gavekî pêvajo bimeşe. Divê ji bo vê yekê zemînek yasayî û hiqûqî were çêkirin. Heke ev zemîn were amadekirin heke ku rayedarên desthilatdariyê carek din werin Amedê wê bi sed hezaran gelê Kurd we bi kêfxweşî û dilgerm pêşwazî bike. Em ji vir bang li birêz Erdogan dikin, gelê Amedê dibêje bila muzakere dest pê bikin, bila ev pêvajo veguhere pêvajoya aştî û çareseriyê û demildest were çareserkirin. Berpirsiyarî û gav avêtin dikeve ser milên rayedarên desthilatê.
Em pirr zelal in
Aliyê me pir zelal e, em alîgirên diyalogê, aştî û çareseriyê ne. Em alîgirên Kurd û gelên Rojava ne. Em dibêjin ku gelên Rojava li ser axa xwe bi awayek azad bijîn û dawî li êrişên li ser wan werin.
Em nizanin çi di banga birêz Ocalan de heye. Em wisa texmîn dikin ku wê birêz Ocalan wek deklarasyona sala 2013an carek din bêje bila çek bêdeng bibin û çareseriya demokratîk biaxive û li pêş bikeve.
Em xwe bi rêxistin bikin
Em ê ji bo vê pêvajoyê û pêngavê em ê mal bi mal bigerin, kolan bi kolan bigerin û em ê bêjin em piştevaniya birêz Ocalan dikin. Em ê bêjin vaye em li vir in. Em xwe bi rêxistin bikin. Heke rêxistinbûna te nebe, wê hêza te jî nebe. Heke em xwe bi rêxistin û bi hêz bikin em ê bi ser bikevin.”
Piştî axaftina Tuncer Bakirhan civînê ji çapemeniyê re girtî berdewam kir.
