* Hevberdevka Dîplomasiyê ya DBPê Hafîze Îpek destnîşan kir ku ji bo aştiyeke mayînde û çareseriyeke hiqûqî divê dewlet êdî dev ji polîtîkayên xitimandinê berde, gavên qanûnî û wêrek biavêje û wiha got: “Rola me ya sereke wekî DBPê ev e ku em li pişt peyama birêz Ocalan rawestin, wateya wê ya kûr ji civakê re ragihînin û rê li ber fêmkirineke rast vekin.”
* Huseyîn Çelîk bavê girtiyê nexweş Turgut Çelîk ê ku di bin tecrîdeke giran de ye û 10 kîlo zeîf bûye diyar kir ku kurê wî ji ber lêgerînên li dijî rûmeta xwe mafê tenduristiyê nikare bi kar bîne û bang li saziyên mafên mirovan kir ku li dijî van pêkanînan derkevin.
* Li bakurê Kurdistan û Tirkiyeyê di 5 mehên ewil yên sala 2026an de 118 jin ji aliyê mêran ve hatine kuştin û mirina bi dehan jinan jî weke “mirina bi guman” hatine qeydkirin. Aktivîsta TJAyê Aynûr Sarica derbarê tundiya li ser jinan de axivî û diyar kir ku divê jin ji bo parastina xwe li her derî komunên xwe ava bikin.
* Li hin navçe û bajarên bakurê Kurdistanê werza çinîna nîsk, ceh û genim dest pê kir. Li gundê Tilhesenê yê navçeya Kercewsê ya Êlihê jî cotkaran dest bi çinîna nîskan kir. Şêniyê gund Nasir Aslan ê ku bi salan e bi karê çandiniyê re mijûl e got: “Buhayê tona nîskan 60 hezar lîre ye, tona genim 16 hezar lîre ye, yê ceh jî 12,750-13 lîre ye. Lê ev yek cotkaran kêfxweş û têr nake.”
* Konferansa “Di Sedsaliya Duyemîn de Veguherîne Komara Demokratîk” dê bi tevlibûna gelek siyasetmedar, nivîskar û rewşenbîran du rojan bidome dê li Navenda Çandê ya Cem Karacayê ya navçeya Bakirkoya Stenbolê îro dest pê bike. (10:00-17:00)
* 1emîn Hevdîtinên Ciwanan a Werzîş û Çandê ya Peyasê dê îro bi panel û çalakiyên cuda berdewam bike. (11:00-23:30)
* Mihrîcana Keda Jinan a Berhemdariyê dê di roja duyemîn de li Wanê berdewam bike. (11:00-18:00)
* Komeleya Lêkolîn û Çavdêriyê ya Koçberiyê ya Mezopotamyayê dê bernameya xwe ya çalakiyên Hefteya Koçberiyê li avahiya xwe ya li navçeya Sûrê ya Amedê bi raya giştî re parve bike. (12:00)
* Şaxên ÎHDê yên Amed, Êlih û Colemêrgê û Xizmên Windayan dê çalakiya xwe ya “Bila winda bên dîtin û faîl bên darizandin” ku her hefte li dar dixin dê bidomînin. (12:00)
* Şaxa ÎHDê ya Îzmîrê çalakiya rûniştinê ya ku ji du hefteyan carekê ji bo windayan li dar dixe, dê li ber Sumerbank a Kevn ya Konakê bidomîne. (13:00)
* Înîsiyatîfa ji Girtiyên Nexweş re Azadî di hefteya 614emîn de li Kolana Sakaryayê daxuyanî bide. (13:30)
* Platforma Jinan a Enqereyê, li dijî Pakêta Darazê ya 12emîn dê li Qada Kolejê daxuyanî bide. (17:00)
* Platforma Jinan a Dîcle Amedê dê derbarê hewldanên hikumetê yên li dijî mafê jinan ê nafaqayê de li Qada Şêx Seîd daxuyaniyê bide çapemeniyê. (18:00)
