Diyar Koç ku di çalakiyên ji bo Rojava de li navçeya Nisêbînê ya Mêrdînê bi îşkenceyê hatibû binçavkirin û bi hedef nîşandanê hatibû girtin di danişîna doza xwe ya ewil de hate berdan.
Derbarê Diyar Koç ku di 20ê Çileyê de li navçeya Nisêbîna Mêrdînê ji aliyê leşkeran ve bi hovîtî îşkence lê hatibû kirin û bi hedefnîşandanê hatibû girtin biryara berdanê hate dayîn. Danişîna ewil a doza derbarê Diyar Koç de bi bi îdiayên ‘endamtiya rêxistinê’, ‘propagandaya rêxistinê’ û ‘ketina qada leşkerî ya qedexe’ hatibû vekirin, li 2yemîn Dadgeha Cezayê Giran a Mêrdînê hat lidarxistin. Diyar Koç, ji Girtîgeha Sîncanê ya ku lê dihat girtin bi Pergala Deng û Dîmen (SEGBÎS) beşdarî danişînê bû û parêzerê wî Rîdvan Kurt jî di eywanê de amade bû.
Danişîn bi tespîtkirina nasnameyê dest pê kir. Diyar Koç di parastina xwe de sûcdarî red kir û îşkenceyên ku lê hatine kirin vegot. Diyar Koç anî ziman ku ew ji kesên îşkence lê kirine gilîdar e û daxwaza berdana xwe kir. Parêzerê Diyar Koç, Ridvan Kurt jî anî ziman ku hêmanên qanûnî yên sûc pêknehatine û daxwaza berdana muwekîlê xwe kir.
Dadgehê piştî navberê biryara xwe aşkere kir û bi şertê kontrola edlî derbarê Diyar Koç de biryara berdanê da. Danişîneke din dê di 29ê Îlonê de bê lidarxistin. Hate diyarkirin ku piştî Diyar Koç ji girtîgehê hate berdan dê biçe mala xwe ya li Colemêrgê.
Çi qewimî bû?
Diyar Koç, di 20ê Çileyê de di çalakiyên protestoyî yên li dijî êrîşên li ser Bakur û Rojhilatê Sûriyeyê û Rojava de li navçeya Nisêbîna Mêrdînê hatibû binçavkirin. Diyar Koç ê ku li ser sînorê Qamişloyê li kêleka bajêr hatibû binçavkirin, bi hovîtî hatibû îşkencekirin. Dîmenên îşkenceyê û heqaretên li dijî Diyar Koç di dîmenan de jî cih girtibûn. Ji ber îşkenceyê xwîn çûbû ser mejiyê Diyar Koç û gelek hestiyên wî şikestibûn.
Diyar Koç di dema binçavkirinê de wekî ‘kesê ku al aniye xwarê’ hedef hatibû nîşandan. Lê belê vê îdîayê di nav hincetên girtinê yên dadgehê de cih negirt. Diyar Koç di 23yê Çileyê de bi îdiayên ‘endamtiya rêxistinê’, ‘propagandaya rêxistinê’ û ‘binpêkirina ewlehiya sînor’ hatibû girtin.
Diyar Koç piştî biryara girtinê şandibûn Girtîgeha Tîpa E ya Mêrdînê û paşê jî sewqî Girtîgeha Amedê hatibû kirin. Rêveberiya Girtîgehê, Diyar Koç ê ku rewşa wî ya tenduristiyê giran bû, ji bo dermankirinê sewqî Nexweşxaneya Perwerde û Lêkolînê ya Gazî Yaşargîlê kiribû. Paşê Diyar Koç ji bo ku ji serê xwe emeliyat bibe di 27ê Çileyê de sewqî Nexweşxaneya Bajar a Etlîkê ya Enqereyê hate kirin. Diyar Koç di 29ê Çileyê de jî sewqî Girtîgeha Tîpa F a Hejmara 1an a Sîncanê hatibû kirin.
