Tevgerên jinan li Îzmîrê li dijî gotinên zayendperest û neteweperest ên Rahmî Koç daxuyaniyek dan. Di daxuyaniyê de hat gotin ku jinên Kurd di navenda pergala mêrperest û tirkperestî de rûbirûyê cihêkariyeke piralî tên.
Tevgerên jinan li Îzmîrê li dijî gotinên zayendperest û neteweperest ên Rahmî Koç daxuyaniyek dan. Li ser navê jinan nûnera Komeleya Çand û Hunerê ya Azad Belkisa Suleymanoglu destnîşan kir ku jinên Kurd di navenda pergala mêrperest û tirkperestî de rûbirûyê cihêkariyeke piralî tên.
Belkisa Suleymanoglu di destpêka axaftina xwe de bal kişand ser rûyê qirêj ê vî zimanî û destnîşan kir ku ev gotinên ku di 5ê Hezîranê de ketine rojevê, qet nabin mijara ‘henek’ an jî ‘pêkenokan’, berevajî vê ev yek hilberîna ji nû ve ya pêşdaraziyên dîrokî yên li dijî jinan û gelê Kurd e û wiha got: “Maka vê çîrokê û bingeha vê qaşo mîzahê li ser wê fersendê hatiye avakirin ku jinên Kurd ji gotinan fêm nake. Ji ber vê yekê, li vir ne tenê riswabûna nasnameya Kurdî heye; di heman demê de nêrîneke çavnebar û zayendîperest ku jinan biçûk dibîne heye. Jin bi sedsalan e ji aliyê hişmendiya mêrserwer ve bi nezanî û kêmperweriyê re têne hevdukirin; Kurd jî her dem di bin herka polîtîkayên de mane. Jinên Kurd tam di navenda van zextan de cih digirin; hem ji ber nasnameya xwe ya jinbûnê hem jî ji ber Kurdbûna xwe rûbirûyê cihêkariyeke piralî û kûr dibin.”
‘Dînamîka herî xurt a têkoşînê jinên Kurd in’
Belkisa Suleymanoglu di berdewamiya axaftina xwe de bi bîr xist ku jinên Kurd her dem ev rolên ku sîstemê li wan bar kirine qetandine û avêtine û wiha pê de çû: “Jinên Kurd di dîrokê de her bûne pêşeng û kirdeyên têkoşîna azadî, wekhevî û demokrasiyê. Îro li Rojhilata Navîn û heta Tirkiyeyê, dema ku behsa herika têkoşîna azadiya jinan tê kirin, dînamîka herî xurt û herî birêxistinbûyî têkoşîna jinên Kurd e. Tam ji ber vê çendê, ev zimanê ku jinên Kurd dike babeta şablonên nizm, ne tenê gotineke ji rêzê ye; ev rasterast êrîşeke li dijî hebûna jinan, têkoşîna wekheviyê û vîna jiyana hevpar a gelan e.”
‘Ev zimanê jehrî ne mîzah e û ne jî azadiya îfadeyê ye’
Belkisa Suleymanoglu, li ser navê TJA, Meclîsa Jinan a DEM Partiyê û Nûnertiya Herêma Egeyê ya DBPê wiha bang li raya giştî kir: “Em bi dengekî bilind dibêjin: Jin ne amûr û mergên henekên hişmendiya mêrserwer in. Jinên Kurd ne babetên şablonên we yên cihêkar in. Gotinên ku bi rûreşkirina beşên civakê têne hûnandin, ne mîzah e û ne jî di çarçoveya azadiya îfadeyê de ye. Bi taybetî gava kesên ku bandora wan li ser civakê heye vî zimanê jehrî bi kar tînin, pêşdaraziyan kûrtir dikin û normalkirina cihêkariyê re rê vedikin. Ji ber vê, li dijî vî zimanê nefretê, meşandina têkoşîna hiqûqî û civakî wezîfeya herî pîroz a civaka demokratîk e. Em ê parastina azadiya jinan, rûmeta jinên Kurd û wekheviya gelan bi biryardarî bidomînin.”
