Şaredariya Bajarê Mezin a Amedê, beriya Cejna Qurbanê piştevaniya xwe ya bi malbatên kêmderfet re zêde kir. Şaredariyê di vî warî de 36 milyon û 855 hezar lire da 12 hezar û 285 malbatan û li hezar û 187 malbatan jî koliyên zexîreyê belav kir.
Şaredariya Bajarê Mezin a Amedê di çarçoveya xebatên xwe yên şaredariya civakî de beriya Cejna Qurbanê piştevaniya xwe ya bi malbatên kêmderfet re zêde kir. Serokatiya Daîreya Xizmetên Civakî di vê çarçoveyê de ji bo welatî hewcedariyên xwe yên bingehîn dabîn bikin û di şert û mercên ewletir de cejnê pêşwazî bikin, xebatên xwe yên piştgiriyê lezandin.
Beriya cejnê alîkariya neqdî gihişt 12 hezar û 285 malbatan
Di çarçoveya xebatên Daîreya Xizmetên Civakî de, beriya Cejna Qurbanê 3 hezar TL li ser hesabê 12 hezar û 285 malbatên ku Kartên wan ên Pişgiriya Civakî (SODES) hene hat razandin. Şaredarî salê 4 caran (her sê mehan carekê) bi awayekî birêkûpêk vê piştgiriya aborî dike û di vê dema dawî de bi giştî 36 milyon û 855 hezar TL alîkarî belav kir.
Ji bo 1187 malbatan pakêtên xwarinê hatin dayîn
Li aliyê din, tîmên şaredariyê piştî lêkolînên civakî hezar û 187 malbatên ku hewcedariya wan bi xurekê heye diyar kirin. Piştî vê tespîtê, tîmên şaredariyên pakêtên ku tê de xurekên bingehîn hene gihandin malên wan welatiyan.
Hat destnîşankirin ku bi van xebatên beriya cejnê, armanc ew e ku piştevaniya civakî xurt bibe û bargiraniya li ser milê welatiyên ku di krîza aborî de zehmetiyê dikişînin piçek be jî sivik bibe.
Xebatên piştevaniyê dê berdewam bikin
Şaredariya Bajarê Mezin a Amedê ragihand ku di çarçoveya polîtîkayên xizmeta civakî de, xebatên wan ên piştgiriyê yên ji bo welatiyên hewcedar dê di nava salê de jî bênavber berdewam bikin.
