Meclisa Ciwanan a DEM Partiyê ya Yalovayê bi boneya 15ê Gulanê Cejna Zimanê Kurdî daxuyanî da. Di daxuyaniyê de ji bo zimanê Kurdî statu hate xwestin û herkesî vexwendin şahiya xwe ya ku 17ê Gulanê pêk bê.
Li herderê Kurdistan û Tirkiyeyê 15ê Gulanê Cejna Zimanê Kurdî bi çalakî û bernameyên cur bi cur tê pîrozkirin. Meclisa Ciwanan a DEM Partiyê ya Yalovayê li Parka Cevdet Aydinê bi boneya 15ê Gulanê Cejna Zimanê Kurdî daxuyanî da. Ciwanan di daxuyaniyê de pankartên “Zimanê me rûmeta me ye”, “Statu ji bo Kurdî statu” û “Zimanê zikmakî mafê me ye” vekirin.
Daxuyaniya ciwanan wiha ye: “Em wekî Meclisa Ciwanan a DEM Partiyê ya Yalovayê, 15ê Gulanê Cejna Zimanê Kurdî li tax û kolanên ku em şêwaza jiyana Kurdî dijîn, zindî û geş dihêlin da pîroz dikin.
Ji bo ku ferdek civakî bibe û civak demokratîk bibe û hêza xwe ya komunal bi dest bixe, divê jiyana bi zimanê dayikê li hemû qadên jiyanê were serwerkirin. Paşgûhkirina zimanê dayikê ku ferdan di nav civakê de bi cih dike, dihêle ku ew ji çanda xwe qut bibin û dibe sedema hilweşandina kes û civakan.
Ji bo Kurdî statu
Ciwan îro û sibê wê di navbera nifşan de parêzvanî û berdewamiya ziman bikin! Em jî wekî ciwanên xwedî nirx dizanin û fêm dikin çima zihniyeta netewe-dewletê ewqas bi tundî êrîşî zimanê Kurdî dike. Zimanê Kurdî zimanekî ku îro wekî berhevoka hemû nirxên jiyana komunal ên herêmî û gerdûnî yên ku ji hêla gelê Kurd ve ji Şoreşa Civakî ya Neolîtîkê ve hatine berhevkirin gihîştiye me.
Bi vî mabesta em jî wekî Meclisa Ciwanan a DEM Partiyê ya Yalovayê ji vir îlan dikin ku em ê bi berpirsiyarî û rêxistinî komuna xwe ya zimanê Kurdî ava bikin û li ser vê komunê xebatê xwe pêl bi pêl bilindtir bikin.
Di 17ê Gulanê da di şahîya xwe ya Cejna Zimanê Kurdî da em ê werin cem hev biaxivin, bixwînin, nîqaş bikin û şanoya Kurdî temaşe bikin. Em hemû ciwanên welatparêz vedixwînin şahî û şanoya xwe. Cejna Zimanê Kurdî pîroz be!”
