Wan – Çanda dengbêjiyê bi sedê salan e li Kurdistanê heye û tevî amûr û pêşketinên teknolojiyê jî li ber xwe dide. Dengbêj Îkram Koç jî bal kişand ser pêşketina teknolojiyê û diyar kir ku tevî vê yekê jî dengbêjiyê xwe parastiye û winda nabe.
Di çanda Kurdan de dengbêjî ne tenê vegotina kilaman, di heman demê de vegotina dîrokê ye. Dengbêjên Kurd bûyerên ku bûne şahid û bihîstine, bi rêya dengbêjiyê heta îro anîne. Lewma dengbêjî di nava Kurdan de cîhekî gelek taybet û girîng digire. Her çend medyaya dîjîtal û şertên nû yên jiyanê bandorê li çanda dengbêjiyê kiribe jî, gelek kes hin jî vê çandê diparêzin. Dengbêj Îkram Koç ê ji navçeya Payîzavaya Wanê ku di malbatek dengbêjan de mezin bûye, her dem bi kilam û çanda Kurdewar rabûye. Îkram Koç dibêje ku çanda dengbêjiyê ji malbata xwe girtiye.
‘Mehmûdê Çelo bi lîstokan dengbêjî fêrî me dikir’
Dengbej Îkram Koç behsa jiyana xwe ya dengbêjiyê kir û got ku bavê wî dengbêj bûye û hem kilamên dengbêjiyê hem jî stranên govendê gotiye. Îkram Koç anî ziman ku wî dengbêjî ji bavê xwe û civaka gund girtiye û got: “Min kilam dengbêjiyê û stranên govendê bi xwe çêdikir û digot. Di ciwantiya xwe de dema ez diketim govendekê, min dikarî 3-4 saetan ser hev kilaman bibêjim. Bi saya dengbêjiyê Kurdbûna me winda nabe û hê jî dewam e. Gelek dengbêjên mezin li devera me hebûn. Mehmûdê Çelo hebû li gel axayekî ji vê deverê digeriya û li ser bûyeran kilam digot. Dema dihat gundê me, zarok kom dikir û bi lîstokan dengbêjî fêrî me dikir. Me dengbêjî ji wan girt. Lê mixabin di roja îroyîn de celatiyek mezin heye û kesên dengbêjiyê dikin weke dîn an jî kêmaqil dibînin. Tevî vê hişmendiyê jî dengbêjiyê xwe parast û me jî berdewam kir.”
‘Dengbêjî winda nabe’
Îkram Koç bal kişand ser pêşketina teknolojiyê û derketina înternetê û wiha got: “Derketina telefon û înternetê bandoreke mezin hem erênî hem jî neyînî li ser dengbêjiyê kir. Ciwan niha berê xwe didin dengbêjiyê û jê hez jî dikin. Lê belê derketina stranên din ên ji çanda me ne, zêdetir bala gel dikşînin. Lê ez di wê baweriyê de me ku çanda dengbêjiyê winda nabe. Bi piştgiriya civakê û çapemeniyê ev çand dê xwe li ser pêyan bigire.”
