Di destpêka salê de êrişên li dijî Rojavayê Kurdistanê her çiqas peşkê li xebatên hunerî xistibe jî lê xebat berdewam dikin. Sînemagerên li Qamişlo li hev civiyan, biryara berfirehkirina berxwedanê dan.
Di salên dawî de Rojava bûye cih û warê xebatên çand û hunerî jî. Qamişlo navenda karên hunerî ye. Di destpêka sala 2026an de li dijî Rojava êrişên tund hatin destpêkirin. Ev êriş bandora xwe li ser xebatên çand û hunerî jî kir. Her çiqas êrişan peşkê li xebatê hunerî dabe jî lê xebat bi hemû lez û bez xwe didomin. Li Mala Şîn a Qamişlo zêdetirî 50 sînemagerên Rojava hatin ba hev û li nêrîn û fikrên hev guhdarî kirin. Kedkar û xebatkarên sînemayê jinûve rêxistinbûyînê û xeta li ber xwe danê nîqaş kir.
Sînameger di çeperên berxwedanê de cih girt
Şer û êrişan bandora xwe li ser xebatên hunerî jî kir. Ev yek bû sedema ku gelek projeyên fîlman ku dihat payîn bên destpêkirin, an hatin sekinandin an jî hatin taloqkirin. Di vê pêvajoya giran de kedkarên sînemayê tenê ne bi xebatên xwe hunerî ve mijûl di heman demê de di nav piştevaniya civakî de cih girtin. Di serî de endamên Komuna Film a Rojav, derhêner, kameraman, senarîst, xwendekarên sînemayê li ser banga seferberiya neteweyî bi awayek çalak di nav berxwedanê de cih girtin û hin sînemageran jî di eniyên berxwedanê dîmen û wêne tomar kirin û rastiyê ji cîhanê re ragihandin. Her wiha sînemageran li şûna xebatên hunerî piştevaniya malbatên ku koçber bûn kirin.
Ji bo siberojê gavên stratejîk
Kombûna kedkarên sînemayê ya duh li Qamişloyê pêk di heman demê de wek gavek stratejîk a ji bo siberojê jî hate pênasekirin. Kedkarên sînemayê ji bo siberoja sînemeya Kurdî ya Rojava nirxandinan kirin û biryar dan ku ew ê di vê qadê de rêxistinbûnê xurt û geş bikin.
Destpêka serdemek nû
Sînemagerên ku li vir axivîn diyar kirin ku kombûna wan moral û motîvasyonê daye wan û ev peyam dan: “Ev kombûn destpêkirina serdemek nû ye.” Sînamegeran di axaftinên xwe de bal kişandin ser pirsgirêkên heyî û rexneyên xwe kirin û hat destnîşankirin ku çareserî bi hilberînek hevpar û ruhek kolektîf pêkan e.
Di kombûna sînamegeran de ev sernav hatin destnîşankirin:
* Divê sînema di her warî de xwe bi sazî û rêxistin bike û torên bermehdayînê berfireh bike.
* Li Rojava divê piştgiriya sînemagerên ciwan bê kirin.
* Di dema herî nêz a pêşiya me de divê bi rojevên şênber komxebat û kargeh werin lidarxistin.
* Ji bo Festîvala Film a Rojava di warê wesf û çawaniyê de ji bo mezinkirina hevpariyê li pêş bikeve û bibe her daîmî.
Piştî vê kombûnê dê kedkarên sînemayê komîsyonekê saz bikin û ji bo lidarxistin Komxebata Sînemaya Rojava û xebatên dane pêşiya xwe kar û xebatan bi rê ve bibe.
