Enqere – Karkerên Madenê ku ji bo heqdestê xwe li Enqereyê çalakî li dar dixin, 9 roj in di dorpêça polîsan de ne û tên binçavkirin. Her wiha li gelek bajaran karker 1ê Gulanê bi berxwedanê pêşwazî dikin.
Karkerên Madenê yên giredayî Sendîqaya Xweser a Karkerên Madenê yên di şîrketa madenê ya bi navê Dorukê de dixebitîn zêdetirî 5 meh in ku nikarin heqdestê xwe werbigirin. Karkeran ji bo heqdestê xwe bi dest bixin li Eskîşehîrê ber bi Enqereyê ve meşek dan destpêkirin. Karker di 20ê Nîsanê de gihîştin Enqereyê xwestin bimeşin ber Wezareta Enerjiyê. Lê karker rastî êrişa polîsan hatin û gelek karker hatin binçavkirin. Piştî binçavkirinê karkeran dest bi greva birçîbûnê kir û çalakiya greva birçîbûnê ya karkeran di roja 9an de berdewam dike.
Karkerên li Parka Kurtuluşê ya navçeya Çankayayê ya Enqereyê di bin dorpêça polîsan de çalakiya xwe didomînin. Duh jî karkeran xwest bimeşin ber Wezareta Enerjiyê rastî êrişa polîsan hatin. Di êrişa polîsan de, Pisporê Rêxistinkirinê yê Sendîkaya Maden-Îşê ya Serbixwe Başaran Aksu û Serokê Sendîkaya Madenê ya Xweser Gokay Çakir hatin biçavkirin.
Her wiha karker jî rastî êrişa tund a polîsan hatin û tevî vê yekê jî karker çalakiya xwe bi israr didomînin. Karker diyar dikin ku heta heqê xwe bi dest nexin dê bi paş ve gav neavêjin.
Dewlet sermayedaran diparêze
Karkerên Madenê ku zêdetirî 5 meh in nikarin heqdestê xwe bistînin xwestin bi Wezîrê Enerjiyê re hevdîtinê bikin. Lê karker ji aliyê polîsan ve bi lêdanê hatin binçavkirin. Her wiha dema karkeran xwest bimeşin ber avahiya Holdînga Yildizê jî ji aliyê polîsan ve dîsa hatin astengkirin û nehiştin karker ji bo heqdestê xwe biçin ber avahiya Yildiz Holdîngê. Rewşa karkerên madenê ku di bin dorpêçe de ne bi awayekî eşkere têkiliya dewlet û sermayedaran radixe ber çavan. Dewlet bi awayekî eşkere bi dorpêçkirin û binçavkirina karkeran, sermayedaran diparêze û nahêle karker heqê xwe ji wan bistînin. Karkerên di dorpêçê de ne bi berzkirina dirûşmeyan bal dikişînin ser têkiliya dewletê û sermayedaran û bertek nîşanî parastina sermayedaran didin.
Xwediyê Yildiz Holdîngê parlamenterê berê yê AKPê ye
Şîrketa Madenê ya Dorukê piştî lêpirsîna ji doza Fethullah Gulen di sala 2022yan de bi îhaleyê ket destê Yildiz Holdîngê. Xwediyê Yildiz Holdîngê parlamenterê berê yê AKPê Sebahattîn Yildiz e. Her wiha Sebahattîn Yildiz xwedî xelata xizmetên paya bilind a Meclîsê ye. Yildiz Holdîng ji bo li ser nedana heqdestê karkeran hincetên weke ji ber rewşa piyasayê wan di meha Adarê de hilberîna ceyranê rawestandiye û ji ber vê yekê pereyên wan tune ne. Piştî berxwedana karkeran xwediyên şîrketê daxuyanî dan ku wan hinek pereyên karkeran dane û ji bo yê mayî jî bidin dê bidin karkerên ku dixebitin. Lê karker jî dibêjin heqdestê hatiye dayîn li gorî heqdestê mayî pereyekî pir kêm e. Tê gotin ku Yildiz Holdîng di dema AKPê de mezin bûye û ji ber têkiliya wan bi desthilata AKPê û MHPê re xurttir dibe û ji aliyê wezaretê vê jî tên parastin.
Karkerên Madenê: Mirin heye lê veger tune ye
Karkerên madenê ku 8 roj in li Enqereyê di greva birçîbûnê de ne tevî birçîbûn, serma û baranê jî bênavber çalakiya xwe didomînin. Karker di her çalakiyê de dibêjin; ‘Mirin heye lê veger tune ye’. Karkerên Madenê ku ji bo heqdestê xwe di greva birçîbûnê de ne ji ber ku karê xwe bi laşê xwe dikin, bi awayekî tazî dikevin bin erdê û madenê derdixînin, di çalakiyê de jî ji bo rewşa xwe nîşan bidin cilên xwe derdixin û bi awayekî tazî çalakiya xwe pêk tînin. Karkerên ku bi rojane bi awayekî birçî li park û qadên Enqereyê ne dixwazin heqdestê xwe werbigirin û vegerin malên xwe.
Karker 1ê Gulanê bi berxwedanê pêşwazî dikin
Ji bilî karkerên madenê li Tirkiyeyê 14ê çalakiyên karkeran hene. Li bajarên weke Edenê, Bursa, Kocaelî, Mersîn, Antalya, Manîsa (Soma), Sêwaz û Muglayê çalakiyên karkeran berdewam dikin. Piraniya çalakvanan karkerên madenê, tekstîl û şeredariyan e. Di hemû çalakiyan de jî daxwaz hevpar in. Karker ji bo heqdestê xwe, tazmînat, mafê sendîkabûyînê û zemkirina muçeyên wan di çalakiyê de ne. Karker 1ê Gulanê Cejna Karker û Kedkarên Cîhanê li qadan bi berxwedanê pêşwazî dikin û li kolan û qadan bertek nîşanî pergalê û desthilatê didin. Karker weke her sal dê îsal jî li dijî xîzanî, birçîbûn û kedxwariyê daxwaza mafên xwe bikin.
