Sêrt – Hevşaredarên Misircê Alî Riza Bîngol û Sadiye Aktîn der barê karesata lehiyê ya li navçeyê de axivîn û diyar kirin ku tevî hemû serlêdanên wan jî saziyên dewletê tu tedbîr negirtine û gotin: “Gelek malbatên me bê mal mane.”
Ji ber barîna barana zêde ya îsal, li gelek bajarên Kurdistanê karesata lehiyê rabû û gelek xesar da derdorê. Navçeya Misircê ya Sêrtê jî yek ji wan cihan e ku ji sê aliyan ve di bin lehiyê de ma. Ji ber lehiyê avê nêzî du mîtroyan avêt nîvê xaniyên welatiyan û xesareke mezin da zad û heywanên wan. Hevşaredarên Misircê Alî Riza Bîngol û Sadiye Aktîn qala şeva karesatê û xebatên şaredariyê kirin.
‘Me welatî bi kemçeyan xelas kirin’
Hevşaredar Alî Riza Bîngol diyar kir ku beriya lehî rabibe ew gelek caran bi Midûriyeta Karesatên Xwezayî re ketine têkiliyê û anî ziman ku daxwazên wan bêr bersiv mane. Alî Riza Bîngol diyar kir ku ew wekî şaredarî ji êvarê heta sibehê li qadê bûne û wiha axivî: “Gelek mirovên me yên ku ketibûn tengasiyê me wan bi agirkuj û kemçeyan xelas kir. Kêfxweşiya me ya herî mezin ew e ku windahiyên canî çênebûn, lê mixabin gelek heywan telef bûn û zadên gel perçivîn. Şaredariya Mezin a Amedê di van sê rojan de bi me re bû alîkar, em spasiya wan dikin.”
Alî Riza Bîngol bal kişand ser xemsariya saziyên dewletê û wiha pê de çû: “Ger saziyên dewletê, Karên Dewletê yên Avê û Midûriyeta Rêyên Bejahiyê karê xwe baş bikirina, ev karesat wisa nedibû. Me gelek caran bi fermî serî li wan da, lê daxwazên me bê bersiv hiştin. Niha em ê dîsa serî li cihên fermî bidin da ku welatî heqê xesara xwe bistînin.”
‘Av wekî çem diherikî’
Hevşaredar Sadiye Aktîn jî destnîşan kir ku lehî ji aliyê gundên Eynikê, Kotîvê û Zoqeydê ve wekî çem herikî nav bajêr. Sadiye Aktînê der barê xebatên paqijkirinê de ev agahî dan: “Taxên Sumer û Yenîmahaleyê xesareke giran dîtine. Di hundirê xaniyan de nêzî 15 santîman herî kom bûye. Me komîsyonek ava kir û em li malbatan digerin. Her wiha personelên şaredariyê yên din jî dişînin malbatan û aliyê wan dikin û xaniyên wan paqij dikin. Xaniyên yek qatî û koxikên heywanan bi tevahî di bin avê de mane. Tişta ji destê me bê em ê ji bo gelê xwe bikin.”
Sadiye Aktîn di dawiyê de anî ziman ku her çend birîndar hebin jî, teseliyeke wan a mezin e ku tu kesî jiyana xwe ji dest nedaye û xebatên wan ên ji bo tespîtkirina xesarê berdewam dikin.
