Li navçeya Bismilê ya Amedê, piştî ku Karên Avê yên Dewletê (DSÎ) deriyên bendavê vekirin û paşê ava Çemê Dîcleyê vekişiya, di golên li peravê de bi hezaran masî ji ber kêmasiya oksîjenê telef bûn.
Di rojên borî de ji ber barînên zêde û bilindbûna rêjeya tijîbûna bendavan, Karên Avê yên Dewletê (DSÎ) deriyên bendavê vekirin. Bi vekirina deriyan re, asta ava Çemê Dîcleyê ji nişka ve bilind bû. Ji ber ku li derdora çem xeteke peravî ya rêkûpêk tune ye, av ji xeta xwe derket û li nava erdên nêzîkî peravê belav bû. Demek şûnde bi vekişîn û daketina asta avê re li nava erdên qiraxa çem golên avê çêbûn. Di encama asêbûna masiyan a di van golan de, karesateke xwezayî rû da. Bi hezaran masî ji ber qutbûna ji çem û bêoksîjeniyê telef bûn. Qiraxa Dîcleyê bi masiyên mirî tijî bû.
Dîmenên ku welatiyan li derdora golan hewl didan masiyên bêoksîjen mayî û can didin kom bikin, bal kişandib ser rewşê. Welatiyan bertek nîşanî vê xemsariyê dan û xwestin tedbîrên lezgîn werin girtin. Li ser agahdarkirina gel, tîmên Midûriyeta Zabiteyan a Şaredariya Bismilê çûn cihê bûyerê û lêkolîn kirin. Hate ragihandin ku tîmên şaredariyê ev wêrankariya xwezayî û mirina masiyan xistiye bin qeydan û dê raporên xwe derbarê mijarê de pêşkêşî rayedarên DSÎyê bikin.
